L’autoproclamada Republica de Donetzk anoncièt dimars passat, 18 de julhet, la proclamacion de l’estat de la Petita Russia, qu’afirman que comprendriá tot lo terriòri d’Ucraïna. Segon l’agéncia d’informacions del govèrn de Donetzk, la Petita Russia s’es proclamada coma estat successor d’Ucraïna.
 
Aquela declaracion, contrària als acòrdis de patz de Minsk, foguèt sul pic rebutada per Russia, que ditz qu’a pas cap de valor legala. Mas lo cap de la Republica de Donetzk, Aleksandr Zakharchenko, assolidèt que la proclamacion respondiá a la demanda de dirigents de divèrsas regions e la qualifiquèt de legala e de granda avançada.
 
 
Ensag d’engatjar Russia
 
Los pròrusses contraròtlan dempuèi longtemps dos airals importants de las regions de Donetzk e Luhansk. Lor intencion èra qu’aquelas doas regions foguèsson incorporadas a Russia, coma se passèt amb Crimèa, mas Moscòu a pas mostrat cap d’intencion de far, almens a tèrme cort.
 
Dins aquel sens, la proclamacion d’un estat successor d’Ucraïna, que serà pas efectiva perque lo govèrn de Kyiv contraròtla la partida pus granda del país, es vista coma un ensag d’engatjar Russia dins lo conflicte e de l’obligar de se posicionar.
 
Segon lo president d’Ucraïna, aquela proclamacion libèra son país del compliment dels acòrdis de patz, e doncas ara poirà menar l’armada ucrainesa a temptar de tornar ocupar las republicas de Donetzk e Luhansk.