Son ja 30 los policièrs de la brigada anticriminalitat (BAC) dels Quartièrs Nòrd de Marselha sancionats per corrupcion, segon çò que raportava ièr lo jornal francés Le Figaro. Segon aquel jornal, 18 nòus membres de la BAC foguèron suspenduts la dimenjada passada per mancança a las nòrmas deontologicas.

Amb los 12 foncionaris meses en examen (7 en preson e 5 jos contraròtle judiciari), son ja 30 los agents de la BAC del nòrd de la Ciutat Focèa sancionats per panatòris de dròga e d’extorsions als dealers. Aquò fa la mitat dels efectius de la còla de jorn de la BAC nòrd.

Dins aquelas condicions, lo servici es totalament desorganizat. Lo ministre de l’interior francés, Manuel Valls, n’a pas pro en far venir los vacancièrs o los agents en recuperacion. Es per aquò que lo nòu director departamental de la seguretat publica, Pierre-Marie Bourniquel, prepara una reorganizacion de las tres BACs de Marselha: sud, centre e nòrd. Aquò poiriá passar per una fusion dels tres servicis perque i aurà pas pro de foncionaris. Pasmens, Marselha foncionariá coma París o Lion, ont i a una sola BAC.

Ça que la, lo sindicat dels executius de seguretat interiora es pas d’acòrdi. “Sèm pas favorables, defendèm la mantenença de tres BACs a Marselha perque la vila a un territòri que s’estend sus 30 quilomètres”, çò diguèt Yves Robert, secretari zonal sud del sindicat. Del sieu costat, lo nòu director central de la seguretat publica, Pascal Lalle, i èra pas favorable quand n’èra lo director departamental; mas, çò ditz, “sembla que i a pas d’autras solucions”.