Lo Comitat d’Afrairament Occitanocatalan (CAÒC) exigís que las bilhetas de vòte del referendum sus l’independéncia que se tendrá lo 1r d’octòbre venent  en Catalonha e Aran sián en occitan tanben en Catalonha tota. Davant la possibilitat que s’estampen en occitan sonque las bilhetas de vòte per Aran, lo CAÒC a mandat una letra a totes los deputats independentistas en lor sollicitant de modificar d’urgéncia l’article 7.1 de la Lei del Referendum. Aquel article establís que las bilhetas seràn en occitan, catalan e espanhòl solament en Aran, del temps que seràn en catalan e espanhòl dins la rèsta del territòri.
 
Lo CAÒC crei que lo referendum del 1r d’octòbre es un eveniment pro important per que los araneses que demòran fòra de la Val d’Aran pòscan exercir lor drech de vòte en lenga nòstra, segon la lei.
 
Dins aquel sens, lo CAÒC soslinha als deputats qu’“ara que Catalonha es a mand de bastir una nòva Republica, que tracte pas la lenga d’Aran coma Espanha a maltractat la lenga dels catalans”.