La persecucion de la Gàrdia Civila contra lo govèrn de Catalonha e sos foncionaris a tocat ara Jaume Clotet, que foguèt un dels fondadors de Jornalet. Clotet, qu’es ara director general de la comunicacion de la Generalitat de Catalonha, foguèt cridat a far una deposicion al comissariat dijòus passat e ne sortiguèt acusat d’un delicte de sedicion per aver impulsat l’elaboracion del sit web del Pache Nacional pel Referendum, çò es una assemblada de politicians, de la societat civila e d’agents socials qu’an trabalhat per menar a bon tèrme lo referendum del 1r d’octòbre venent, que l’estat espanhòl ensaja d’empedir.
 
La Gàrdia Civila a acusat tanben lo president del Pache Nacional pel Referendum, Joan Ignasi Elena, e lo secretari general de la Presidéncia, Joaquim Nin.
 
La Gàrdia Civila agís coma polícia judiciària e mena los interrogatòris en fasent comprene als interrogats que son acusats d’un delicte de sedicion, çò que remandariá l’afar a l’Audiéncia Nacionala, un tribunal d’excepcion madrilenc eiretièr del Tribunal d’òrdre public de la dictatura de Franco.
 
 
L’escàndol de las acusacions
 
Per quant a el, lo conselhièr de la justícia de la Generalitat revelèt l’escàndol. D’un caire publiquèt sus Twitter la letra de convocacion a far una deposicion al comissariat, que ditz seguir d’òrdres del Tribunal d’Instruccion numèro 13. De l’autre, lo Tribunal Superior de la Justícia de Catalonha precisèt que las convocacions de la Gàrdia Civila son de mandats de polícia judiciària non sollicitats pel Tribunal d’Instruccion numèro 13.
 
Tot aquò fa pensar que se tracta d’una estrategia policièra e non pas judiciària. Mentretant, VilaWeb se demanda s’aquela persecucion dels nauts responsables del govèrn es legala.
 
 

És urgent saber per ordre de qui actua la Guardia Civil quan interroga funcionaris, empreses i càrrecs públics. pic.twitter.com/azRzhqe46x

— Carles Mundó (@CarlesMundo) 27 de juliol de 2017