Aqueste dimars passat, 1r d’agost, es intrada en vigor en Portugal la lei que legaliza la maternitat de substitucion per las femnas esterilas, çò rapòrta Esquerda.net.
 
La maire portaira se deurà sometre a una revision psicologica e poirà pas recebre d’argent per aquel prètzfach, franc de las despensas medicalas. En mai d’aquò, aurà un contacte amb lo nenon limitat al minim indispensable, a causa dels “eventualas risques psicologics e afectius qu’entraïna aquel ligam, sens prejudici de las situacions que la gestanta de substitucion siá un membre pròche de la familha”. Dins aquel sens, se priorizarà la relacion amb lo nenet de la maire genetica, e totun los dreches de l’enfanton seràn totjorn prioritaris abans tot.
 
Portugal aviá aprovat aquela lei en 2016. Mas lo decret que n’especifica la regulacion deguèt esperar a junh passat per èsser aprovat. La lei aviá patit lo vèto del president Marcelo Rebelo de Sousa, que considerava que i aviá “de vuèges juridics” per velhar suls dreches del mainadet e de la maire gestanta. Ara, après qualques modificacions, la lei es en vigor.