L'estrategia chausida per lo laboratòri de recercha daus monuments istorics per luchar contra quilhs champanhòus faguet mas agravar la contaminacion: lo fongicidi espandut favorizet lo desvelopament de tachas negras. Quilhs estudis tòrnen préner las donadas d'un rapòrt presentat en 2011 au conselh scientific de la bauma de Las Caus per Claude Alabouvette, microbiologista dijonenc, e Cesáreo Sáiz Jiménez se-mesma. Segon Claude Alabouvette, fauguet una lucha acharnada per obténer la fin daus tractaments antifongics e chausir una gestion ecologica de la bauma. Pertant, quelas conclusions son pas partejadas per l'ensems de la communautat scientifica e quitament contestadas en dedins dau conselh scientific. Per Bernard Cazeau, president dau Conselh Generau de Dordonha, ren d'estonant, e pensa quitament a una ataca per desnaturar l'accion dau conselh scientific e dau ministeri de la Cultura dont depend lo laboratòri de recercha daus monuments istorics.

 

La fragilitat de la bauma demandet de trobar de las solucions per permetre un accès dau public a queu patrimòni. Barrada en 1963, faudrà esperar d'acianta 1980 per accedir a Las Caus II, còpia de la bauma bastida rasis l'originala. Auei, son los projectes Las Caus III e IV que fan tornar viure la bauma. Reünits a las Aisiás la setmana passada, los conselhiers generaus de Dordonha an pogut descubrir l'exposicion transportabla Las Caus III. Compausada de cinc paneus d'una susfàcia totala de 200 m2, representa una partida de la bauma que fuguet pas reprodusida dins Las Caus II: la nau. Exposision a vocacion internacionala, sera presentada a Cap Sciences a Bordèu, lo 13 d'octòbre venent davant de partir per l'America dau Nòrd e l'Asia. Las Caus IV, projecte de centre internacionau d'art parietau a Montinhac, avança tanben. La chausida demest los 88 architectes en competicion se farà au mes d'octòbre venent. Queu centre permetrà de compréner mielhs Las Caus, sas òbras e sos secrets.


Maime Caillon