Primièra mobilizacion dels salariats per carrièras dempuèi l’arribada al poder de François Hollande. Lo sindicat francés CGT comencèt dimars passat un movement de caumas e de manifestacions dins tres vilas occitanas: Clarmont-Ferrand, Marselha e Tolosa; e dins d’autras vilas de l’estat: Lion (Arpitània), Épinal (Lorena), Roazhon (Bretanha) e París. Los manifestants manifestèron per “la defensa del trabalh e de l’indústria”.

“S’anóncia d’aplants del trabalh dins de nombroses sectors: metallurgia, quimia, trabalhadors de l’estat, minas e energia, veire e ceramica, agroalimentari, pòrts, talhièrs de construccions navalas, ferroviaris, santat, transpòrts, comèrci, foncions publicas”, segon de declaracions del sindicat dirigit per Bernard Thibault a Le Figaro.
 
La CGT apèla los salariats a participar per “pesar durablament sus las causidas” que lor tanhon. “Se qualques desenats de milièrs de personas son per carrièras, lo contracte serà largament emplit”, prevenguèt a Reuters diluns passat Mohammed Oussedick, membre de la CGT.
 
“Espèri que i aurà fòrça mond perque i a urgéncia en matèria de trabalh. Sèm dins un contèxt de crisi que s’agrava tanben perque s’adutz pas las bonas responsas”, çò diguèt Bernard Thibault sus France 2. Mentre que de las negociacions istoricas sul mercat del trabalh comencèron la setmana passada, la CGT entend refusar tota flexibilitat suplementària. “Pensi qu’avèm de contrabalançar una pression plan fòrta dels entrepreneires que cèrcan d’obténer per aquel govèrn çò qu’aurián pogut obténer d’una anciana majoritat”, çò diguèt Thibault diluns sus France Inter.