De scientifics de Nòva Zelanda an capitat d’obténer de lach a l’espròva d’allergias en modificant geneticament una vaca. Engendrada dins de laboratòris estatals, “la vaca es l’espèr de 3% dels enfants qu’en lor primièr an de vida tolèran pas lo lach”, çò dison los resultats obtenguts per AgResearch, que se publicaràn dins la revista Proceedings of the National Academy of Sciences (PNAS).

La vaca Daisy arriba qualques 15 ans après la feda Dolly, lo primièr mamifèr clonat del mond, e “conten una quantitat plan petita de betalactoglobulina (BLG), una de las proteïnas del lach qu’es pas presenta dins lo lach uman e que pòt causar de reaccions allergicas”, çò a explicat Stegan Wagner, un dels cercaires del projècte.
 
De mai, lo lach de Daisy conten una granda quantitat de caseïnas, es a dire, d’autras proteïnas que son presentas dins lo lach de vaca e que lo fan mai nutritiu que lo lach d’una vaca comuna.
 
Los laboratòris son encara a analisar lo lach de Daisy per corroborar sas caracteristicas ipoallergenicas fàcia a sa comercializacion en Nòva Zelanda, un país conegut per son estricta regulacion en seguretat alimentària.
 
Ça que la, lo lach de la vaca Daisy desvelha pas lo meteis entosiasme demièg los ecologistas de Nòva Zelanda. L’animal nasquèt sens coa, e segon lo legislador del Partit Verd neozelandés, es un perilh que met en risc lo país coma productor de noiriduras naturalas e seguras.
 
En mai d’aquò, Bleakley a remembrat que pendent los dotze ans de recèrca per aténher la Daisy, AgResearch a emplegat de centenats d’embrions de vaca pels experiments e lor calguèt suspendre lor programa de clonacion pr’amor que sonque 10% dels animals subrevivián a las espròvas.
 
Al delà, pendent la recèrca scientifica, s’usèt de mirgas clonadas per produsir un tipe de proteïna de BLG de feda en lo lach dels petits ratons, mejançant una tecnica d’inibicion genetica nomenada interferéncia per ARN.