La justícia de Marròc a condemnat 24 independentistas saharauís a de penas fòrça duras: sèt activistas son condemnats a perpetuitat, quatre a 30 ans de preson, d’autres sièis a 25 ans e d’autres tres a 20 ans. Los acusan de “violéncia contra las fòrças de l’òrdre qu’a provocat la mòrt”, en referéncia als eveniments del 8 de novembre de 2010 dins lo campament de Gdeim Izik a Al Aayun. La senténcia la prononcièron lo 17 de julhet passat dins l’encastre de la fòrta polemica levada per las criticas e las denóncias dels observaires internacionals, dont d’avocats, que susvelhan lo procès judiciari, çò rapòrta Directa.
 
Los 24 activistas, coneguts coma lo grop de Gdeim Izik, foguèron detenguts en 2010 dins l’encastre del deslotjament del campament d’aquel nom, çò es lo campament de la dignitat. Aquí se teniá un acamp de protèsta qu’amassèt mai de 20 000 saharauís a l’entorn d’Al Aayun, anciana capitala del Sahara Occidental, ocupada per Marròc dempuèi 1975. Los acampats exigissián lo respècte dels dreches umans e la tenguda del referendum d'autodeterminacion del pòble saharauí, promés dempuèi 1991 per l’ÒNU. Aquela mobilizacion Noam Chomsky diguèt que foguèt lo detonador de la Prima Aràbia.
 
La dissolucion del campament de Gdeim Izik se faguèt dins l’encastre d’una militarizacion totala dels territòris ocupats per Marròc dins una opacitat mediatica absoluda. La populacion d’Al Aayun respondèt a la repression amb de rambalhs dins divèrsas zònas de la vila amb un bilanç d’11 agents marroquins mòrts e dos saharauís. Las autoritats ocupantas arrestèron 25 activistas, dont Hassana Aalia, qu’es a l'ora d'ara exiliada dins l'estat espanhòl.
 
Tre alavetz, los 24 condemnats son estats encarcerats en Marròc. Dins un primièr moment foguèron jutjats per un tribunal militar. Mas en 2016, a la seguida de la fòrta pression internacionala exercida per las organizacions dels dreches umans, comencèt un procès judiciari menat per la Cort d’Apèl de Salā.
 
 
De jutjaments plens d’irregularitats
 
Dempuèi decembre de 2016, se son debanadas sèt sesilhas del jutjament, que son estadas interrompudas e remesas divèrses còps per decision del quite tribunal, çò qu’a causat d’usura fisica, psicologica e financièras per las familhas dels jutjats. En mai d’aquò, los avocats e d’autres observaires internacionals que susvelhan lo procès denóncian d’irregularitats, d’intimidacions, de mesuras de seguretat absurdas dins las sesilhas, de torturas contra los acusats, e lo fach de ni admetre ni prene en compte lo jutjament de la Comission contra la Tortura de l'ÒNU.
 
Davant la prevision del resultat del jutjament, lo 17 de julhet, l'organizacion Human Rights Watch exigissiá de las autoritats judiciàrias marroquinas de prene pas en compte las deposicions obtengudas jos tortura .