Un des grani arguments des opausants ara independéncia de Catalonha qu’ei eth hèt qu’eth Barça quitarà de jogar ena liga espanhòla de fotbòl. Es defensors que diden tostemp qu’un Estat catalan de 7 milions d’abitants e a capacitat entà crear ua pròpria liga de fotbòl o, arribat eth cas, eth Barça be poderie contunhar de jogar ena liga espanhòla maugrat apartier a un aute estat sobeiran, dera madeisha manèra qu’es equipes de Luxemborg o de Mónegue e jòguen es competicions de França.
 
En aguest sens, luenh deth rambalh mediatic e politic, era Union Esportiua Bossòst que hè 80 ans que jògue ath fotbòl ena liga francesa, ena categoria “Excellence”. Era equipa non aparten cap ara federacion catalana de fotbòl e tanpòc ara espanhòla, e considère que jogar damb es sòns frairs occitans resulte economicaments fòrça mès atractiu, pr’amor qu’es quilomètres que cau hèr enes desplaçaments son fòrça mens. Que cau tier en compde qu’eth club e comencèc a jogar en Occitània hè 80 ans, quan es comunicacions dera Val d’Aran entà Catalonha e èren guaireben inexistentes e er accès ara rèsta d’Occitània ère fòrça mielhor.
 
Ath delà, eth Bossòst non ei cap un convidat de pèira ena liga francesa. En 1982 qu’artenhec eth trionf en campionat dera tresau regionau, e tanben compde damb dues victòries dera Copa Comenge, era mès importanta que se jògue en Nauta Garona. Normauments que jòguen ena categoria “Excellence” damb era rèsta d’equipes dera region administrativa de Meddia Pirenèus, e tanben jòguen pera Copa de França.
 
Era Union Esportiua Bossòst ei, donques, er exemple dera normalitat esportiua e deth sens comun, quan era politica non s’i met peth miei. Demoram qu’ara que bèri mejans espanhòus ac an descorbit non les pressionen cap entà que quiten de jogar damb era rèsta d’Occitània.
 
 
 
 
JC/FM