Lo parlament de Turquia aprovèt a la fin de julhet una lei qu’enebís als deputats de nomenar lo genocidi armèni o parlar de Curdistan, çò rapòrta Gepolítica.cat que cita l’agéncia Anadolu. Segon aquelas informacions, los legislators pòdon patir de multas o de suspensions per los qu’ “insultarián lo president o los parlamentaris, e tanben los que “criticarián l’istòria de la Republica de Turquia” o “l’òrdre constitucional del país”, e encara los qu’“emplegarián de tèrmes contraris a l’integritat indevesibla de l’estat amb sos territòri e nacion”.
 
Dins aquel sens, la lei prevei tanben que perdràn lors dreches los deputats que s’abstendràn de prestar jurament, coma es lo cas del Partit Democratic dels Pòbles (HDP), un partit qu’amassa los curds e d’autras minoritats nacionalas de Turquia.
 
Aquela lei, pro ambigüa, es similara a l’article 301 del Còde Penal turc que prevei de penas d’entre sièis meses e dos ans de preson per “aver denigrat publicament la nacion turca, l’estat de la Republica Turca o la Granda Assemblada Nacionala de Turquia e las institucions de l’estat”.
 
Aquel article permetèt lo jutjament e lo secutament de l’escrivan Orhan Pamuk, de l’editor Ragıp Zarakolu, de l’istorian Taner Akçam, del jornalista Hrant Dink (d’origina armènia, que foguèt assassinat per un nacionalista turc en 2007), d’Arat Dink (lo filh de Hrant) e de Serkis Seropyan, editor d’Agos; demest d’autres qu’avián escrich sul genocidi armèni.