Lo primièr camping libertin d’Occitània ten un grand succès a Brujat, en Limanha Borbonesa. Apelat La Roseraie (lo jardin de ròsas), s’agís d’un curiós campament de vacanças pels adèptes del libertinatge. Lo sit dobriguèt las pòrtas fa tres ans e fonciona totjorn amb fòrça vam, çò rapòrta France Bleu.
 
Lo camping es dobèrt a totòm a partir de 21 ans e las règlas principalas son l’igièna, la confidencialitat e la seguretat. Cada òste a un braçalet que segon sa color permet de far conéisser se cèrca un òme, una femna o de parelhs.
 
Lo sit a 80 emplaçaments per tendas, camping-cars, caravanas, e tanben i a de bungalows coma dins quin camping que siá. Puèi i a los espacis de vida comuna: una piscina e tres grands lièches per coquinar, tres bungalows de tela amb de taula de massatges, una pista de dança amb una gàbia e un lièch “Gang Bang” per las orgias de 7 mètres de long sus 2,5 mètres de larg.
 
Tanben i a una prada coquina e un petit bòsc coquin amb un canton BDSM de la crotz de Sant Andrieu e d’autras installacions per practicar de jòcs sadomasoquistas en plena natura.
 
Las personas que pòrtan pas lo braçalet son expulsadas. En mai d’aquò, de coquinar es pas una obligacion mas simplament una possibilitat.
 
Segon lo reportatge de France Bleu, lo 40% dels clients venon dels Païses Basses. Los vacancièrs i pòdon restar o i anar sonque passar la jornada. De fach, se ditz que la demanda es talament granda que i a de mond que van cada jorn al sit mas que se lòtjan dins d’ostalariás de l’entorn per manca de plaça.