Plusors actes de benvenguda aculhisson dempuèi dijòus passat Rafa Díez, lo politician independentista basco de la còla d’Arnaldo Otegi. Encarcerat sièis ans e mièg per aver volgut crear un espaci politic ont i aguèsse pas de plaça per la violéncia, lo cap independentista basco èra estat acusat d’aver ensajat de tornar bastir lo partit illegalizat Batasuna. Cal dire que Batasuna foguèt pas jamai illegal en Euskadi Nòrd, e i tenguèt normalament son activitat fins a la data de sa dissolucion, anonciada a Baiona lo 3 de març de 2013.
 
A Rafa Díez lo detenguèron fa uèch ans, mas abans que purguèsse sa pena, li concediguèron un relambi per que s’ocupèsse de sa maire malauta. Es per aquò que l’an liberat un an pus tard qu’Otegi.
 
Díez èra embarrat dins una preson de la region de Cantàbria, que son govèrn a enebit tot acte de benvenguda, e per ansin se son faches sonque al Bascoat. Lo meteis jorn de la liberacion, après èsser aculhit per una molonada a la pòrta de la preson, se tenguèt a Muskiz un acte en favor de la libertat d’expression e en defensa del retorn dels presonièrs bascos al Bascoat e de ser un esmovent acte a Lasarte.
 
 
L’afar Bateragune
 
Rafa Díez foguèt condemnat per apertenéncia a una banda terrorista dins l’encastre del dich “afar Bateragune”, ont los jutgèron, a el e a d’autres politicians, amb l’acusacion de tornar fondar Batasuna —un partit politic basquista, independentista e socialista qu’èra estat illegalizat en Espanha en 2003— e tanben de s’èsser amassats amb ÈTA dins una temptativa ont lo grop declarèt una trèva, per fin que de basquistas poguèsson participar a las eleccions municipalas e autonomicas bascas de 2011.
 
Los autres condemnats de l’afar son ja en libertat: se tracta d’Arnaldo Otegi, de Miren Zabaleta, d’Arkaitz Rodríguez e de Sonia Jacinto.
 
 
Lo moment de la liberacion:


 

Urte luzez itxarondako besarkada! Ongi etorri Rafa! pic.twitter.com/xosUGYA9qh

— Arnaldo Otegi (@ArnaldoOtegi) 17 d’agost de 2017