Segontes informacions que mos arriben dirèctaments dera Cagira d’Estudis Occitans dera Universitat de Lhèida, en capítol d’aué dera sèrie de TV3, “Kubala, Moreno i Manchón” (KMM) er occitan -concrètaments er aranés- i serà present en bèri dialògs.

Entad aquerò, es productors dera sèrie qu’an compdat damb era intervencion dera Cagira d’Estudis Occitans dera Universitat de Lhèida, qu’ath delà de revisar formauments es dialògs, n’a determinat tanben era realizacion fonetica.
 
De hèt, eth capítol que permeterà veir qu’un des personatges principaus d’aguesta sèrie –qu’enquia ara a obtengut uns boni resultats d’audiéncia– e ei occitanofòn.
 
Quitament s’era preséncia der aranés ei anecdotica, qu’arremercam que be serà eth prumèr viatge qu’era lengua occitana e apareish en ua sèrie de ficcion emetuda per TV3.
 
En d’autes ocasions, er aranés que s’a entenut peth sistèma dual en bèth programa especiau, e ena programacion especificaments en aranés: es informatius d’Aran e en blòt de notícies jornalèr deth canau 3/24. Que cau tanplan soslinhar qu’eth programa “Caçaires de paraules” e dediquèc integrauments ua des sues emissions ar aranés en 2008.
 
KMM qu’ei ua sèrie de detectius situada en Barcelona. Que s’emet aué entàs 22h29 per TV3. Es occitans de Garona enjós, que poderàn veir eth capítol de KMM per Internet, un shinhau mès tard.




Ferriòl Macip