Un grop racista norvegian de Facebook, que ten mai de 13 000 seguidors, se serviguèt de la confusion que la presentava un imatge publicat sus Internet per propagar de comentaris racistas e desagradius. L’imatge presentava las siloetas escuras de sièis sètis inocupats d’un autobús, mas aquel grop racista norvegian del ret social l’empleguèt en interpretant que s’agissiá de sièis femnas vestidas de burqas, e los messatges xenofòbs proliferèron: “Aquò es esglasiant”,  “Sabèm pas pus se son d’òmes o de femnas”, “Se pòt pas jamai saber qual es jos aquò”, “Poirián èsser de terroristas amb d’armas”, “Las cal expulsar de nòstre país”...
 
La publicacion venguèt virala, segon çò que rapòrta The Washington Post, sustot après que l’aguèt partejada lo publicista norvegian Sindre Beyer amb lo tèxt: “Çò que se passa quand se publica una fòto d’un autobús inocupat dins un grop de Facebook afastigant e gaireben totes creson de veire un molon de burqas”.

 

 
L'usatgièr que publiquèt l’imatge reconeguèt que se tractava d’una badinada: “Pensèri a la diferéncia entre la critica legitima de l’immigracion e la xenofobia cèga”, çò diguèt a Nettavisen.