14 personas mòrtas e aperaquí un centenat de nafradas es lo tragic bilanç de l’atemptat terrorista que lo patiguèt ièr Barcelona e qu'es revendicat per l’autoproclamat Estat Islamic. A l’entorn de 17h, un individú que menava una camioneta se roncèt sus la molonada que passejava per la Rambla en provocant lo seten masèl de las caracteristicas començadas a Niça lo 14 de julhet d’arunan. Lo veïcul, qu’aviá avançat de 550 mètres en fasent de zigazagas, s’espotiguèt contra un quiòsc e lo menaire fugiguèt a pè.
 
A l’entorn de 19h30 i aguèt un autre incident probablament restacat amb l’atemptat. Una veitura forcèt lo barratge de la polícia e reversèt un agent en li rompent una cavilha. La veitura foguèt interceptada tres quilomètres pus tard. Aquí se produguèt un intercambi de fuòc que se concluguèt amb la mòrt del menaire. Segon de fonts dels Mossos d’Esquadra, la polícia catalana, l’òme èra pas restacat amb l’atemptat.
 
I a doas personas detengudas mas, segon los Mossos d’Esquadra, cap d’elas es pas l’autor dels faches. Un dels detenguts seriá Driss Oukabir, de nacionalitat marroquina, qu’aviá residit a Marselha. Oukabir refusa tot ligam amb los faches e d’efièch, qualques oras abans l’atemptat, aviá denonciat al comissariat de polícia de Ripoll que li èran estats panats sos documents d’identitat, amb los quals los terroristas aurián logat doas forgonetas, dont una d’elas a permés de cometre lo crime. L’autre detengut es son fraire.
 
Lo govèrn de la Generalitat de Catalonha, presidit per Carles Puigdemont, e la consolessa de Barcelona, Ada Colau, an constituit un gabinet de crisi. Après l’atemptat, afirmèron en public que “Barcelona es una vila de patz e d’aculhiment e fièra de sa diversitat, e contunharà de o èsser”. Tanben lo president del govèrn espanhòl, Mariano Rajoy, sa vicepresidenta e lo ministre de l'Interior an interromput lors vacanças e son anats a Barcelona.
 
 
Explosion de gas
 
Lo cap dels Mossos d’Esquadra, Josep Lluís Trapero, assolidèt ièr de ser que l’atemptat qu’aviá terrorizat lo centre de Barcelona èra dirèctament restacat amb l’explosion d’una vintena de botelhas de gas butan qu’aviá agut luòc dimècres passat dins una bastissa de la vila d’Alcanar. Aquel incident faguèt un mòrt e un nafrat.
 

Cambrils: la polícia a abatut cinc presumits terroristas
 
Puèi, aperaquí a 1h de la nuèch de dijòus a divendres, cinc òmes armats que portavan de cenchas explosivas aurián ensajat de cometre un segond atemptat a Cambrils, una vila toristica près de Tarragona. Los Mossos d’Esquadra ensagèron de los arrestar e se produguèt un escambi de fuòc que finiguèt amb la mòrt dels cinc presumits terroristas: quatre moriguèron sul pic e lo cinquen defuntèt qualques oras mai tard a causa de sas feridas.
 
Los faches se passèron près d’una ostalariá ont s’èra lotjat Mohammed Atta en 2001, sèt setmanas abans de cometre los atemptats de Nòva York.


 

---

La Generalitat de Catalonha a mes en marcha un sit web per seguir totas las informacions restacadas amb los atemptats.