Aqueste dissabte 26 d’agost, se tendrà a Wembley la finala de l’edicion 2017 de la Cup. Serà jorn de repaus en Superliga e un moment bèl per recargar las batariás costat Dragons Catalans abans lo terrible mes de setembre que s’anóncia.
 
 
Brutus compren pas mai
 
Cada setmana, avèm dreit al discors mobilizaire dels dirigents, de l’entraïnaire e de cèrts Dragons, mas lo dissabte sus la pelena tot es doblidat!
 
Atal, aqueste dissabte, amb la recepcion dels Centurions de Leigh. Los Sang e Aur perdèron lèu lor talonaire Aiton marcat sus la fuèlha de partida alara que se sabiá nafrat. Foguèron menats 16-0 a la pausa, per pèrdre fin finala 30-6.
 
Warrington a batut Halifax: 22-8; Widnes a pas fait de detalh amb Featherstone: 58-10 e Hull KR a ganhat una partida plan disputada contra Londres: 35-30.
 
Warrington e Hull KR an ganhat las primièras tres partidas e se plaçan per la montada dirècta. Widnes e Leigh an ganhat dos còps e los Dragons se trapan amb una sola victòria en 3 partidas e una diferéncia de punts negativa: - 50.
 
Demòran quatre partidas per se sortir d’aquesta plan marrida passa: dos desplaçaments a Halifax (3 de setembre) e a Hull KR (17 de setembre) e doas recepcions: las de Featherstone (9 de setembre) e de Widnes (23 de setembre).
 
E benlèu la partida-atrapa de barratge entre lo 4n e lo 5n per la darrièra plaça liura en Superliga per la sason venenta.
 
Dimenge, los juniors catalans an pas res pogut faire en mièja finala del campionat U 19 contra lo cap de fila Wigan: desfaita 42-6.
 
 
Un bloquièr per Castleford
 
Lo Bloquièr Bèl se balha a la formacion qu’acaba en primièra plaça la fasa de classament. Aprèp 91 ans d’existéncia, los Tigres de Castleford avèran enfin un trofèu, en assegurant, davant un estadi cómol, una victòria sus Wakefield: 45-20.
 
A Leeds, se festejava… la vièlha tribuna sud promesa a la destruccion e a la renovacion. Los Rinocèros se deguèron emplegar per batre Saint Helens 16-14.
 
Hull-FC aviá lo cap a la finala de la Cup e pèrd sus sa pelena fàcia a Huddersfield 18-46, alara que Wigan domina Salford 42-6.
 
 
Tolosa en mièja finala
 
Mercé a sa victòria sus Rochdale 50-12, Tolosa s’assegura de jogar la mièja finala de sa competicion a domicili. La partida venenta se jogarà diluns 28 d’agost, de nuèit (8 oras), sus l’estadi de Blanhac amb la recepcion de las Aglas de Sheffield.
 
 
Rendètz-vos a Wembley
 
Aqueste dissabte, a Wembley, la finala de la Cup metrà en oposicion lo detentor del trofèu Hull FC e un grand acostumat del rendètz-vos: Wigan. Plan mal aisit de dire quala formacion tornarà partir de Londres amb lo trofèu (de seguir en dirècte sus BeInSport; 4 oras del vèspre, ora occitana). En 2013, Wigan aviá batut Hull FC: 16-0.
 
 
NRL causís sos qualificats
 
En Austràlia, demòran doas jornadas de partidas de classament abans de passar a las pelhòfas. I prendràn part la Tempèsta de Melbourne, los Cavals Fòls de Brisbane, los Polets de Sydney, las Làmias de Cronulla, las Anguialas de Parramatta e las Pantèras de Penrith. Las 7a e 8a plaças son encara en jòc.
 
 
 
 
Alan Roch