D’agents de la polícia catalana, los Mossos d’Esquadra, tuèron diluns de ser Younes Abouyaaqoub, considerat coma lo menaire de la camioneta que s’èra ronçada sus la molonada dijòus passat a la Rambla de Barcelona en tuant 13 personas. La collaboracion ciutadana foguèt decisiva per que los policièrs trobèsson lo terrorista, amagat dins una vinhareda de l’encontrada de Penedés.
 
Quand los agents li demandèron los documents d’identitat, Abouyaaqoub dobriguèt sa camisa en mostrant quicòm que podiá semblar una cencha explosiva, e diguèt: “Dieu es grand”. Per tant, los agents lo tuèron. Pasmens, la cencha explosiva èra falsa.
 
 
Quatre detenguts davant los jutges
 
En mai dels terroristas abatuts, la polícia a arrestat quatre jovenòmes estacats amb los atemptats terroristas que los patiguèron dijòus passat las vilas catalanas de Barcelona e Cambrils, e que provoquèron la mòrt d’una quinzena de personas. La polícia los a liurats a las autoritats espanhòlas, que los an menat a la dicha Audiéncia Nacionala, un tribunal d’excepcion especializat en delictes de terrorisme. Los quatre detenguts se tròban en condicion de far una deposicion.
 
Lors declaracions seràn importantas per obténer mai de donadas sus l’organizacion terrorista.
 
 
Acamp de la comunautat musulmana
 
Mentretant, a Barcelona, lo collectiu musulman s’acampèt sus la Plaça de Catalonha per condemnar lo terrorisme. Los manifestants portavan de bandeiròlas amb de messatges nets e clars: “Avèm pas paur”, “Islam es patz”, “Pas en nom nom”, e tanben de messages de mercejament als Mossos d’Esquadra. Cridavan totes ensems lo lèma popular de refús al terrorisme “Ai pas paur” mas tanben “Sèm musulmans, tanben sèm catalans”.
 
La marcha s’acabèt amb un manifèst que metiá l’accent suls joves de la comunautat musulmana del país.  Demana qu’aqueles joves non integrats “pòscan sentir que Catalonha es lor país”, mentre que reconeis “un problèma que [devon] pas amagar”.