Lo fach que s’empleguèsse tanben la lenga catalana dins una conferéncia de premsa per explicar l’accion policièra après los atemptats de Barcelona e Cambrils provoquèt una reaccion de colèra de qualques jornalistas espanhòls ispanofòns, que torcèt pas brica lo major dels Mossos d’Esquadra, la polícia catalana, Josep-Lluís Trapero.
 
En seguida de las protèstas dels jornalistas ispanofòns quand Trapero respondiá a de questions en catalan, Trapero ensagèt d’explicar sa causida lingüistica. “Respondi en catalan a las questions que las me pausan en catalan, e en espanhòl a las questions que las me pausan en espanhòl”. Mas en vesent que las protèstas contunhavan e qu’un jornalista madrilenc quitava la sala, la responsa de Trapero foguèt neta e clara, en mesclant catalan e espanhòl: “Bueno, pues molt bé, pues adiós” (bon, e ben fòrt plan, e ben adieu-siatz). Aquela reaccion es estada fòrça saludada. Se fa de camisetas e de pegasolets amb l’imatge de Trapero e sa frasa, qu’es venguda de mòda mondialament suls rets socials.
 
Trapero compareguèt diluns passat davant los mèdias acompanhat del conselhièr de l’Interior de la Generalitat de Catalonha, Joaquim Forn, e del conselhièr de la justícia Carles Mundó. Expliquèron al detalh lo trabalh que l’a fach la polícia de Catalonha après los atemptats que patiguèron dijòus passat Barcelona e Cambrils amb un tragic bilanç de 15 mòrts. Respondèron a las questions dels jornalistas, en espanhòl a las questions pausadas en espanhòl e e catalan a las questions pausadas en catalan. La conferéncia de premsa seguissiá una declaracion del president catalan, Carles Puigdemont, prononciada en catalan, espanhòl, anglés e francés.

 
 

És lamentable q després de la feinada dels @mossos molesti el català a les rodes de premsa. El @govern sempre les fa en català i castellà! pic.twitter.com/nc2DlvJ8w8

— Sergi Forcada (@sergifor) 21 d’agost de 2017

 
 
 
#BuenoPuesMoltBéPuesAdiós tuits