Los sindicats majoritaris de la polícia espanhòla e de la Gàrdia Civila an publicat ensems un comunicat qu’es fòrça critic amb lo govèrn espanhòl car los a daissats “excluses e isolats” pendent la gestion e l'enquèsta dels atemptats de Barcelona e de Cambrils. L’Associacion Unificada dels Gàrdias Civils (AUGC) e lo Sindicat Unificat de la Polícia (SUP) planhon dins aquel comunicat “l'afebliment de las institucions e dels responsables politics” espanhòls, que considèran qu’“an marginalizat intencionalament de l'enquèsta l’experiéncia e l’estructura dins la lucha antiterrorista” dels dos còrses de seguretat. Segon eles, tot aquò s’es efectuat amb la tòca de “transmetre un imatge a l’exterior de nòstras frontièras d’un estat catalan «autosufisent», en instrumentalitzant sens nada rason la seguretat publica, en assumissent doncas los errors e las consequéncias que pòscan derivar d’aquela praxi”.
 
Per exemple, repròchan un supausat “empediment” d’una unitat especiala de la Gàrdia Civila a l’ostal ont los terroristas preparavan d’explosius. Mas tanben soslinhan que las autoritats catalanas desconeissián cèrtas informacions importantas que la polícia espanhòla teniá. Segon eles, “se fan tornarmai evidents la flagranta violacion dels acòrdis de cooperacion e lo foncionament deficient entre las diferentas fòrças e còrses policièrs”.
 
Lo comunicat saluda lo trabalh qu’an fach los Mossos d’Esquadra “qu’an riscat lors vidas per protegir las dels ciutadans”. Mas planhon que l’estat aja mesestimat las fòrças de seguretat estatalas.