Lo nombre d’enfants, mai que mai de filhas, emplegats coma bombas umanas, a crescut considerablament dins lo nòrd-èst de Nigèria. Dempuèi lo 1r de genièr passat, 83 mainats son estats utilitzats per aquel prètzfach crusèl, çò rapòrta Geopolítica.cat, que mençona lo chepic màger manifestat per l’UNICÈF.
 
Las donadas son esglasiantas. Durant l’an 2017 son estats victimas d’aquela atrocitat 55 dròllas, la majoritat de mens de 15 ans, dont una neneta, e 27 dròlles.
 
L'utilizacion d’enfants dins las atacas terroristas se repercutís tanben suls enfants liberats rescatats o que son arribats de fugir Boko Haram, puèi qu’aquò aumenta la paur e la sospiècha devèrs eles. En consequéncia, los mainats que son pas pus presonièrs s’afrontan al refús quand vòlon tornar integrar lors comunautats. Aquò fa créisser lor sofrença.
 
 
UNICÈF dona de supòrt psicosocial als enfants que son estats detenguts per Boko Haram, e trabalha tanben amb lors familhas e comunautats per que sián acceptats. De mai, l’organisme per l’enfança sosten d’activitats de tolerància, d’acceptacion e de reïntegracion.
 
 
1,7 milions de desplaçats e una famina sevèra
 
Aquela situacion se produtz dins un contèxt de desplaçaments massisses e de crisis  alimentàrias. A l’ora d’ara i a 1,7 milions de personas desplaçadas.
 
La region nòrd-èst de Nigèria patís grèvament la menaça de famina, amb mai de 450 000 mainats que riscan una malnutricion aguda ongan.