Mireille Darc nos quitèt diluns passat a sos 79 ans. L’actritz provençala, sex-symbol e icòna del cinèma francés, trabalhèt dins mai d’una cinquantena de filmes, dont qualques unes amb Alain Delon, amb qui aguèt una longa relacion d’en primièr amorosa, puèi amistosa entrò sa mòrt.
 
Nasquèt a Tolon abans d’anar trabalhar en 1959 a París pel teatre, la television e lo cinèma, ont coneguèt la celebritat en 1963 amb lo filme Pouic-Pouic coma coprotagonista amb Louis de Funès, puèi d’òbras famosas dels cineastas Yves Robert e Georges Lautner. L’actritz aviá, per son paire legal, sas originas familhalas en Soïssa arpitana e son nom oficial èra Mireille Aigroz. Sa maire èra una provençala de Turriás, non luènh de Forcauquier.
 
Dins las darrièras annadas de sa vida se consagrèt a d’accions de caritat e de 1992 a 2015 realizèt de documentaris sus d’aspèctes de la condicion femenina: las prostitutas, las actrises pòrno, las femnas sens domicili fixe.