Los xinesos ho faran d'aquí a un parelh d'ans. La tecnologia xinesa amb míssils e espaciala es la melhora del mond. Los missils carracas USA no tenen precision ni per ferir a un blanc de detz metres quadrats lancats des de 2 quilomete.

#15 Mossur Gaubert,

La vraia Revolucion es pas tecnologica : es enteriora, esperituala (pas religiosa). Sarà aquò lo vrai progrès de l'umanitat. Sèm totjorn a voldre forçar lo cors naturau de las causas e acceptam pas de s'i plegar. E sèm oblijats de convenir que las resultas son vergonhosas e deçaventas : s'endevenèm pas emb d'aquò naturau, fasèm còntra aquò naturau, oblidant que sèm eissits de l'evolucion de la Vida, mès èssers naturaus pasmens.

Ara, se pensatz que los Òmes s'arrestaràn solament a d'estudis dau planeta Mart, sètz liure d'o pensar. Ieu, i crese pas : an provat mai d'un còp que podiam pas lurs faire fisança. Savèm pro ce qu'aquò donèt au començament pièi a la fin, quand espanhòus e americans anèron "descovrir" America... Son pas totjorn dinc la coperacion los umans, son tanben dinc la competicion, lo rapòrt de fòrça e la cobesiá. Vos sufís pas l'Istòria per pròva ? Ensajarai de vos convencir perque i crese (prepausicion), mès vos forçarai pas de me seguir (qu'aquò sariá una empausicion).
Sèm pastats d'ideologia e de volontat de dominacion. Mès sèm pas que micròbes dinc l'univèrs ! E se fariam passar gaireben per los creators de la vida... ?

Siái pas d'acòrdi emb de vos, mantene ma pausicion. Siái per la recèrca scientifica dau moment qu'es destacada dals enterès e profièchs ; dau moment qu'a per tòc de servir l'uman, de li rendre certans aspècts de la vida mens penables, sens gaire artificializar la Vida nimai la sometre. Siái per la recèrca scientifica dau moment que son tòc es de far compréner la melhora direccion de préner per viure d'un biais armoniós mès lucide emb de tot ce que pòrta vida aiçaval, dinc la comprension de coma foncionam e coma fonciona la Vida. Autrament, sèm dinc l'orguèlh patologic, dinc l'asserviment, dinc la sobrespression de l'ego.

Per quant a mon argument de "pishaprim vistaflac" que disètz, fai pas besonh escampar de sòus a milhons per l'espaci, quand sèm a pauc près segurs que nòstra Tèrra poiriá finir coma Mart, se contunham nòstras conariás umanas (arma nucleària, pollucion,...). Pro de scientifics an dejà travalhat quí-dessús sens esperar qu'anem sobre Mart per aquò : nòstra Tèrra es un temoniatge a ela sola, pièi que nos a liurat bien de secrèts, gramecí los scientifics.
Non, siái pas quauqu'us de la consciença tancada, disent de non a tot. Non. Mès vòle èstre dinc la mesura, que pecam d'oblidança amai de foliá a l'ora d'ara.
Quò me fai pensar en d'aqueles legits locaus o regionaus que pagan char un cabinet per un estudi sus la dangieirositat o l'eficacitat de quicòm quand despièi mai de 20 ans, associacions, monde de la societat civila, actors dau terrenh ne'n tenon las pròvas e pòdon temoniar.

E se saguère duret a la critica de vòstre comentari passat, es que lo sentiguère eufemizant. Es coma se m'aviatz pegat, pensant qu'aquò me correspondiá, lo provèrbi : "Quau vai detràs lo sèrre, sap pas çò que vai quèrre !".
E las allusions o las atacas dirèctas còntra de pretenduts reaccionaris, ne'n manca pas sus aqueste blòg e n'ai mon confle... ! En mai d'aquò, son sovent de monde de (estrèma-)gaucha : se o dison pas, o fan bien sentir. E per ieu, quand los legisse o que los entende per carrièiras, son tant dangieirós que de monde de drecha. Se fan los justiciaires de la vida dals autres, confortats dinc lur bòna consciença d'aveire forçadament rason, los autres estent pas que de reaccionaris e potenciaus faissistas !
Pòde pas pus sofrir quela mena d'entolerents de la paraula de l'Autre. Afortisse que son capables d'estremisme. E crese pas que dinc l'Istòria, o constatam encara a l'ora d'ara dinc lo monde, la (estrèma)-gaucha siágue estada forçadament un esemple de santetat... !
Ni de drecha, ni de gaucha ieu. Me fau mas opinions. Me pegue pas d'etiquetas. Analise las causas e me fise dau sen, sens cabussar neciament dinc l'angelisme ni aderir tuclament a l'autoritarisme e a l'argent-rei. Es aquò la mesura, l'emparcialitat e lo coratge d'èstre se sens culpabilizar o cranhir d'èstre jutjat per lo politicament corrècte.

Per ce qu'es de " l'occitanisme" que ne'n parlatz a la fin, coma que vire, siái pas pus occitanista e m'o revendiquère pas jamai. Cevenòu e Òme d'Òc, tot simplament, que se bat per son identitat. Es enquicòm mai que l'occitanisme deu faire un gròs travalh : passa a costat d'aquò essenciau per una presa de consciença generala e un usatge sociau de la lenga (autre subjèct).
Per acabar, se pensatz francament que mos prepaus son los d'un tòni e que mancan de coërença, es que sètz de marrida fe. Emb d'aquò, pas mai.

Coralament pasmens, un fraire d'Òc.

N'i a que fan de collectatges sus la planeta Òc, que ne pòrtan de tròces dels parlars que se mòren.
Se ren se fa, aquelis tròces finiràn coma mòstras dins las veirinas dels musèus de la lenga d'òc.
An pas besonh d'un aterrador per s'i pausar, e d'una fusada per s'en tornar en França.
Pareis que la planeta Òc es abitada...

#14 Arren ne justifica ua tau desbondada, mes puishqu’ac prénetz atau…
A çò qui sembla la libertat d’expression qu’ei la libertat d‘estar d’acòrd dab vos, e l’amor deu debat democratic ne v’encara pas a léger los comentaris deus demei shens i trobar çò qui n’i ei pas.
Que cèrqui enqüèra çò que i a de politic en la mia arremarca #12.
Quin rapòrt dab la xenofobia, la mentalitat comunautària e Corsega?
E vòletz díser que la sciéncia e seré d’esquèrra e l’obscurantisme de dreta? Que’vs daishi la responsabilitat d’aquera opinion (mes desvolopatz, desvolopatz: n’ètz pas luenh de’m convéncer).
—
Aquí se parla pas d’anar colonizar Mart (e quan ac seré) senon de har sciéncia, es a díser explorar, estudiar, descobrir, compréner (o au mensh assajar). Per exemple, assajar de compréner com Mart qui avè ua atmosfèra e aiga a hiòrlas e vadó lo desèrt toxic qui ei uei.
N’arrèglaràn pas la hami mondiau ni lo paludisme en daishant de har de cèrca fondamentau e l’estudi deu sistèma solar qu’ei cèrca fondamentau. En soma, l’estudi deus planetas nos interèssa pr’amor que vívem sus un planeta.
E donc, òc ben l’argument "An pas de sòus a fotre enquicòm mai ?!" n’ei pas un argument de dreta o d’esquèrra: qu’ei un argument de pishaprim vistaflac, totas sensibilitats mescladas.
—
Si votre comportement dans le débat démocratique est représentatif de l’occitanisme, vive la République française une et indivisible.

#12 Un còp mai, un qu'enterprèta mos prepaus en me fasent finalament passar per quauqu'us de la consciença tancada, un manejaire de la paur, un reaccionari... E se quiche un pauc, saique me farà passar per un qu'aima pas los marcians : un zenofòbe ! Quau sap ? Mancariá pas qu'aquò se boton a demandar la nacionalitat francesa... !

Puta de tentacion ideologica que part d'una critica per resquilhar vèrs la suspicion.
Eu, l'òme, de qué creses que fariáun los umans se anèsson poplar lo planeta Mart ? Las mèmas salopariás qu'aiçaval a la fin, aquelas que las patisson nòstra Tèrra emb totas las formas de vida.
A... justiciaires de la Santa e Angelica Gaucha Occitanista, prèstes a denonciar lurs fraires per patin-patan-pas res...
Podètz pas vos empachar de politizar tot ce qu'atrapatz per los comentaris : aquò's vengut patologic.
Coneissètz la libertat d'espression ? Savètz vos pausar dinc lo desbat democratic sens esageracion, sens analisi duala (clar/escur, roge/blau, ben/mau) ?

Se aquò's aquò èstre occitan, aimariái mièlhs d'èstre còrse : eles aumens se ponchejan pas dau det entre eles, s'acusan pas, an una vraia mentalitat comunautària. Es aquò que fai de Corsega l'inla que tot lo monde bada ! Son pas coma aicí, viron-vireta a totas las auras, chascun virant l'aiga a son molin e se donant pièi bòna consciença en escupissent sus son vesin e fraire !