Tèxte legit
Qu’èran un quarantenat de personas dissabte passat a Soston en las Lanas tà dar l’aviada a l’associacion Ràdio País Lanas-Baish Ador. Se s’i escaden, que serà lo sol mèdia en lenga nosta dens aqueth parçan.
Har enténer lo gascon au pòst, aquiu lo prètzhèit d’aquera navèra associacion, dens un parçan on ei en creishéncia lo militantisme occitan, sheis mes sonque arron la creacion de l’IEO 40 ’Gascons cap e tot’ en mai passat.
Dens lo perlogament d’aqueth tribalh alavetz, un projècte mèdia pesuc, que òc, mes tanben plan bastit, dab objectius clars e ua equipa bèra. Be n’ei donc capable, l’occitanisme, a còps, de har las causas de dret, shens cantar vrèspas abans maitias.
E s’òm pòt regretar ua representativitat benlèu un drin flaca de la joenessa, l’estrambòrd qu’ei vertadèr, e l’arsec plan sancèr.
Tanlèu elejut president de l’associacion, Alain Castagnet qu’èra dejà au micro de...Ràdio País! :
“Qu’i avè hòrt de monde, que hè gai, que muisha qu’èra ua vertadèra atenta e qui a monde qui son interessats entà recéber ua ràdio qui parla en gascon (…) arrés n’ac gausavan har (...), mes que i a monde qui demandan ua preséncia deu gascon. Nosautes n’am pas arren! Uei, lo qui vòu escotar ne pòt pas. La lenga n’ei pas entenedèra, que’s moreish. Que podem har tots los cors qui volem, que cau ua ràdio, senon que morim”.
Luenh d’estar ua faderia, lo gascon dens lo pòste que balha ua legitimitat de compte har, qui da un sens vertadèr au son ensenhament. Tròp sovent en efèit, l’emplec de l’occitan que s’estanca au portau de l’escòla (en las Lanas com alhors), çò ns’hidè Pierrick Bòrdenava, regent au Bocau-Vielh:
“Qu’ei un tipe d’atruna qui de qui èi besonh tà muishar que l’occitan ei shens que la lenga de l’escòla, çò qui’s pòt créder de quan en quan pr’amor vertat que sovent, los pairs d’escolans ne son pas occitanofòns (…) Aquiu, que va perméter, a tèrme, de balhar drin de visibilitat a la lenga en dehòra de l’escòla, çò qui ei suberimportant”.
Après annadas de madurèr, de militantisme mut, lo topin qu’èra donc plen arràs, e que’n sorteish uei lo dia ua volontat peluda d’arreviscolar la lenga nosta dens aqueth parçan. De bon notar tanben un semblant de coesion interassociativa, un anar de tribalhar eficaç qui’s pèrd mei anar mei dens lo noste hialat. De pelejas que n’i aurà, segur, mes l’interès generau que sembla per un còp au delà deus interès personaus.
Dab Ràdio País donc, mes tanben l’IEO 40, Gascon Lanas, lo Cafè Gascon de Dacs, la botiga Adishatz, Pit Produccion e d’autes enqüèra, solide que poderam comptar suus de las Lanas e deu Baish Ador dens las annadas a viéner tà que visca la lenga nosta!
Lo conselh d’administracion que’s compausa de nau personas, dab lo burèu seguent:
— Alan Castagnet, president.
— Lucia Albèrt, dinerèra.
— Marisa Castagnet, secretària.
— Lucia Albèrt, dinerèra.
— Marisa Castagnet, secretària.
La prumèra amassada de Ràdio País Lanas-Baish Ador que’s debanarà lo 13 d’octobre.
Joan-Nadau Commières
Ràdio País
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Cal haver unas bonas radios en Oc que tothom las puga escoltar amb una bona qualitat sonora.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari