Lo president espanhòl, Mariano Rajoy, a menaçat los foncionaris e los cònsols màgers per que se mene pas a bon tèrme lo referendum independentista, del temps que lo ministèri public espanhòl demanda de perseguir al penal lo burèu del Parlament e qualques membres del govèrn de la Generalitat.

Ièr dijòus, l’endeman de l’aprobacion de la Lei del Referendum pel Parlament de Catalonha e de la consecutiva convocacion del vòte, lo president del govèrn espanhòl, Mariano Rajoy, anoncièt la recusacion de la lei catalana al Tribunal Constitucional. En mai d’aquò, demandèt de notificar de responsabilitats penalas al president catalan, Carles Puigdemont, als membres de son govèrn, a totes los nauts responsables de la Generalitat qu’ajan de responsabilitats dins lo referendum e als cònsols màgers de 947 comunas. Dins aquela notificacion lo govèrn espanhòl vòl que s’avertisca totas aquelas personas que son obligadas d’empedir quina iniciativa que siá per l’organizacion del referendum.
 
Rajoy repetiguèt divèrses còps que lo referendum se tendriá pas. “La consulta se farà pas. I aurà pas nat referendum perque aquò consistís a privar l’ensems dels espanhòls de decidir lor avenir. Ni lo govèrn ni mai los tribunals o pòdon pas tolerar en cap de cas”, çò declarèt dins una conferéncia de premsa qu’acceptèt pas de questions dels jornalistas.
 
En mai d’aquò, Rajoy diguèt que la convocacion del referendum èra “clarament un acte de desobesissença, e lo govèrn se considèra obligat de defendre la dignitat de las institucions. Sèm obligats de far complir la constitucion”.
 
Dimècres passat,  dins una jornada plena de tensions e de trabucs, la majoritat independentista de la cambra catalana aprovèt una lei que permetèsse de realizar lo referendum d’independéncia del 1r d’octòbre que ven. E dijòus s’aprovèt la lei de transitorietat que definís cossí deu aver luòc lo pas devèrs una republica independenta. La reaccion del govèrn espanhòl al Parlament de Catalonha es restada sus sa linha abituala.
 
 
Perseguits al penal
 
Lo procuraire general de l’estat espanhòl, José Manuel Maza, compareguèt tanben per anonciar que fariá de denóncias al penal contra los membres del burèu del Parlament de Catalonha per aver permés l’examen de la lei del referendum e de la lei de transitorietat. E mai contra los membres del govèrn de la Generalitat, per aver signat lo decret de convocacion del referendum.
 
Lo ministèri public considèra qu’an comeses de delictes de desobessisença, prevaricacion e malversacion de fonzes publics.
 
En mai d’aquò, donèt instruccions a la Gàrdia Civila, a la polícia espanhòla e als Mòssos d’Esquadra per qu’enquistèsson sus totas las accions de preparacion del referendum.