Lo jornalista provençal Albert Mamberti es mòrt a l’atge de 105 ans, après una vida entièrament consagrada al jornalisme. Mambreti nos quitèt a l’ostal de retirada L’Occitanie de la vila de Cabriés (País Marselhés), çò rapòrta La Provence.
 
Mamberti afrontèt las darrièras annadas de son vielhum amb luciditat e amb una curiositat viva e insaciabla per l’actualitat, per l’art e per las gents. En julhet passat seguissiá encara lo Torn de França e gardèt entrò lo darrièr moment son abituala capacitat d’analisi per legir los jornals.
 
Mamberti comencèt sa carrièra en 1932 a Le Radical, l’edicion del ser de Le Petit Provençal. Puèi coneguèt un brèu passatge a Marseille Libre e venguèt jornalista esportiu de Le Petit Marseillais.
 
Exprimiguèt son talent tanben al setmanièr L’Essor, mas lo mèdia essencial de sa carrièra foguèt Le Méridional, ont intrèt en 1946 fins al moment de sa retirada en 1977.