Actualitats
An descobèrtas, a Eras Bòrdas de Les, de pinturas romanicas amagadas darrièr lo retaule
An descobèrtas a la glèisa d’Orjot, a Eras Bòrdas de Les (Coserans), de pinturas romanicas en un estat de conservacion excepcional, segon çò que rapòrta lo jornal La Dépêche. Las pinturas son estadas trobadas après desmontar un retaule del sègle XVIII.
Las frescas representan cinc apòstols, qualques signes del zodiac e una cortina. “Los apòstols son reconeissables pels lors atributs e perque son identificats pel nom”, çò diguèt a La Dépêche Philippe Mercier, comissari regional dels monuments istorics de la Direccion Generala dels Afars Culturals (DRAC).
“Las pinturas descobèrtas a la glèisa d’Orjot son leugièrament desparièras de las que coneissèm. L’estil e l’iconografia son mai près de las òbras del començament del sègle XII e son comparablas a las pinturas monumentalas de las glèisas catalanas fachas pel Mèstre de Taüll”, apondèt Mercier.
L’an que ven se començarà de las estudiar per n’esclarzir la datacion e saber se son fachas abans o après aquelas de Taüll (Païses Catalans), e qual n’es lo ligam.
La dobertura de doas fenèstras dins l’absida, al sègle XVI o XVII, auriá copat las representacions de tres o quatre apòstols de mai.
La glèisa d’Orjot rèsta per ara barrada al public. La municipalitat d’Eras Bòrdas de Les e la DRAC velhan sus la seguretat de la trobalha.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
E per çò que n'es del Mèstre de Taüll, (plan segur occitano-catalan, sens cap termièras nòrd sud) es un artista mai qu'important, fondamental per l'istòria de las Arts occidentalas : non cal pas oblidar qu'es el lo primièr artista qu'aja evocat e representat lo Sant Grasal, portat per una Dòna, al pè del Crist en Majestat que podèm remirar amb musèu d'art catalan de Barcelona. Sa pintura data d'abans los primièrs escrits parlant d'un Sant Grasal… Una descobèrta, aquí faita dins un joièl romanic dels Pirenèus gascons, ven confortar la riquesa patrimoniala comuna occitano-catalana qu'èra ja evidenta. Per ne saber mai sus l'afar de l'invencion artisitica del famós Sant Grasal, recomandi als lectors del jornalet qu'entendon lo francés de legir l'estudi canadian remirable aqueste : "La Vierge et le Graal - Les origines d'une légende" de Josep Goering, Collection Histoire, Edition Les Belles Lettres, Paris 2010. L'estudi original en anglés foguèt publicat en 2005 ja. Mercés plan a la valenta còlha del Jornalet de nos aver tenguts assabentats d'aicesta informacion preciosa.
Ara cal enviar aquela còla al temple de l'istòria de França per desmontar lo retaule de Michelet per descobrir l'istòria d'Occitània;
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari