Un milion de personas, segon la polícia locala, manifestèron ièr a Barcelona a l’ocasion del jorn nacional de Catalonha, en demandant l’independéncia e de poder votar lo 1r d’octòbre venent. A aquela data lo govèrn catalan a convocat un referendum per l’independéncia de Catalonha e Aran, mas l’estat espanhòl ensaja de l’empachar. Se poiriá dire qu’es estada la manifestacion mai multitudinària de sosten a l’independentisme que l’aja viscuda la capitala de Catalonha. (Fòtos)
 
“Votarem” es lo crit mai repetit d’aquela manifestacion, que formèt una crotz gigantassa dins lo centre de Barcelona, em comolant la Carrièra Aragó e lo Passeig de Gràcia. L’acampàs comencèt amb una esmoventa minuta de silenci en memòria de las victimas dels atemptats terroristas.
 
Dins los parladisses, lo president de l’Assemblada Nacionala Catalana (ANC), Jordi Sánchez, faguèt una crida a desobesir als tribunals espanhòls e a votar lo 1r d’octòbre. Tanben remembrèt qu’en Catalonha èra pas pusvalida la legalitat espanhòla, e diguèt a las autoritats espanhòlas, qu’an mandat las fòrças de l’òrdre cercar los bulletins de vòte: “A totes aqueles que cèrcan desesperadament las urnas e los bulletins de vòte, vos devèm dire que l’ANC sabèm ont son. E o sabèm cèrtament. Anatz lo 1r d’octòbre dins quin burèu de vòte que siá e trobaretz un país que vòl èsser liure”.
 
Aquel eveniment marca la campanha de las principalas associacions independentistas per l’òc a aquel referendum. Dins aquel sens i aviá de bandeiròlas gigantas que saludavan “lo nòu país”, “Euròpa”, e la “republica”.
 
 
Per una republica occitanocatalana
 
Qualques collectius occitanistas jonguèron la crida de la seccion aranesa ANC de la Val d’Aran en s’amassant al tròç numèro 401 de la manifestacion. La còla de Jornalet i èrem amb una bandeiròla que revendicava una republica binacionala de Catalonha e Aran. Après la manifestacion, la bandeiròla se portèt a la Rambla, la carrièra pus centrala de Barcelona. Una abitanta plan simpatica, amiga d’Aran e d’Occitània tota, nos cediguèt son balcon per far venir ben vesedoira nòstra revendicacion.
 
 
La “Diada” de l’11 de setembre
 
L’11 de setembre, los catalans se remembran de la casuda de Barcelona en 1714 davant las tropas borbonosas. Lo País Valencian casèt en 1707 e Malhòrca en 1716. Aquela desfacha representèt la fin de las institucions catalanas e la castelhanizacion del país.
 
 
Retorn dins la premsa internacionala
 
E mai se la premsa espanhòla ensajava de descreditar l’eveniment, los principals jornals internacionals ne parlavan, lo meteis jorn de ser: