Lo parlament d’Iraq refusa lo referendum d’independéncia del Curdistan Meridional previst pel 25 de setembre que ven. Dimars passat, la cambra aprovèt una mocion de refús de la consulta dins una sesilha que i foguèron pas presents los deputats curds, que critiquèron l’iniciativa. Es previst que l’assessor del govèrn curd Hoshiyar Zebari responda uèi.
 
Lo primièr ministre d’Iraq, Haider Al Abadi, e lo parlament iraquian an considerat inconstitucional lo referendum, convocat unilateralament pel president del Curdistan Meridional, Mesûd Barzanî. La mocion del parlament d’Iraq dona tanben de poders a Abadi per que prenga “totas las mesuras necessàrias” per preservar l'unitat de l’estat. “Sollicite del dirigent curd que venga a Bagdad per dialogar”, çò disiá dimars lo primièr ministre d’Iraq.
 
 
Un país independent de facto
 
Curdistan es una nacion sens estat, administrada pels estats turc, iranian, iraquian e sirian. Los curds darrièrament fan l’actualitat a causa de la fòrta repression que subisson en Turquia, de lor lucha dins la guèrra de Siria, de lor resisténcia contra l’Estat Islamic e del ròtle important de las femnas dins aquel conflicte armat. Lo Curdistan Meridional, la partida iraquiana, es ara una region autonòma que fonciona de facto coma un estat independent dempuèi la guèrra d’Iraq de 1991.
 
Los curds reclaman la creacion d’un estat dempuèi la fin de la Primièra Guèrra Mondiala, quand las poténcias occidentalas definiguèron los estats de l’Orient Mejan e devesiguèron lo pòble curd entre Iraq, Turquia, Siria e Iran.