Almens 83 personas mòrtas e de centenats de nafradas es lo tragic bilanç d’una sèria d’atemptats terroristas dins lo sud d’Iraq, dijòus passat. E mai se s’agís d’un masèl màger, los mèdias ne parlan pas gaire, e es fòrça probable que lo nombre de mòrts aja aumentat considerablament, car plusors nafrats èran dins un estat de santat critic. L’autoproclamat Estat Islamic a revendicat lo chaple.
 
Un grop de terroristas fusilhèron los policièrs d’un pòste de contraròtle sus l’estrada principala entre Bagdad e Bassòra, près d’An Nāşirīyah. Puèi intrèron dins dos restaurants de la vila de Fedak, ont fusilhèron los clients dels locals. Encara d’autras terroristas kamikazes faguèron espetar lors cenchas explosivas per far aumentar lo nombre de mòrts.
 
La majoritat de victimas son de pelegrins shiitas en provenença d’Iran, qu’anavan vesitar los santuaris religioses del sud d’Iraq.
 
Fa doas setmanas, l’EI ataquèt un mercat a Bagdad amb una veitura explosiva. Lo bilanç d’aquel assaut foguèt d’onze mòrts e d’una trentena de nafrats.
 
L’Estat Islamic es en plena guèrra contra l’armada e la polícia iraquianas. A perdut lo contraròtle de qualques províncias mas encara ten qualques zònas del nòrd e de l’oèst del país. Pasmens, après las desfachas de Raqqa e de Mossol, l’Estat Islamic pòt venir mai perilhós. Lo califat s’esforçava de crear un estat real amb poder sus sos ciutadans, mas ara poiriá tornar a sas originas: las atacas terroristas indiscriminadas dins quin país que siá del Mond.