A dobèrt fa un parelh de meses un nòu restaurant a Rius de Menerbés, qu’a decidit de trencar l’uòu en emplegant la lenga del país; li dison: Lo Bèl Polet. Coma o indica lo nom, se tracta d’un establiment de restauracion rapida que prepausa mai que mai un menut a basa de polalha, mas pas sonque, car los vegetarians son pas estats doblidats: se i prepausa tanben de burgers faches amb d’steaks vegetals, d’ensaladas, e mai tota una carta directament inspirada per la gastronomia iberica (tapas, fideuà, paella). 
 
De notar qu’en mai d’emplegar dobèrtament e condrecha la lenga nòstra, la direccion del restaurant trabalha amb de productors locals: lor pan es lo d’un artisan fornièr del país, los legums son del mercat, la carn es d’origina francesa e, entre las bevendas prepausadas, se trapa de vins de Menerbés o encara de bièrras Dòna Carcàs, que son produchas a Peiriac de Menerbés, un vilatge vesin ont se tròba -per còp d’azard?- la calandreta Los Cascamèls. 
 
Per aver tastat de lor cosina, la còla de Jornalet nos jonhèm a las recomandacions del sit Trip advisor que lo qualifica, aquel establiment, d’excellent.
 
E lor desiram bon astre!