E mai se la comuna de Vielha l’aviá enebit, se tenguèt ièr a Vielha l’acte en favor del referendum d’independéncia de Catalonha e Aran previst pel 1r d’octòbre que ven. Malgrat l’enebicion municipala e las menaças de far venir la polícia, l’eveniment se debanèt normalament amb la participacion d’unes 150 personas, çò rapòrta Aué TV. Aquel nombre de participants es estrambordant e despassa fòrça las previsisons de l’organizacion.
 
A l’acte participèron la deputada Mireia Boya (CUP), lo cònsol de Les, Emílio Medan (Unitat d’Aran), e Julian Fernández, pòrtavotz de Podèm en Aran. L’eveniment finiguèt amb un aperitiu acompanhat de la musica d’Alidé Sans.
 
“Tot era proïbicion auem decidit desobeir d’ua manèra tranquilla, civica, pacifica, en tot hèr aguest acte pera defensa des drets fonamentaus dera gent; dret de reünion, de liura expression e sustot eth dret d’autodeterminacion”, çò diguèt Boya al mèdia aranés.
 
Per quant a el, Medan, qu’es un dels 712 cònsols màgers menats en justícia per aver donat lor supòrt al referendum, planguèt la persecucion de l’estat en considerant que se violava los dreches fondamentals dels ciutadans e comparèt la situacion actuala amb lo franquisme. “Cau èster conscients qu’estam caminant cap a un estat autoritari qu’ei mès pròxim ara Turquia d’Erdoğan qu’as democracies occidentaus, e açò era gent joena que non visquec dilhèu era dictadura aurie de pensar en camin qu’a agarrat eth nòste estat, aguest sistèma qu’a fòrça perque era esquèrra espanhòla, subretot eth PSÒE, li da supòrt, perque se que non, non ac gausarien hèr”.
 
En mai d’aquò, tant Boya coma Medan tanben deplorèron la manca d’engatjament dels partits araneses en tot remarcar qu’es important qu’Aran aja un imatge fòrt de país, àò que non se produtz pas ara.
 
Vejatz l’informacion sus Aué TV.
 
 

 
 

E atau auem acabat er acte aguest maitin! Aran tanben vò votar! #Òc#ReferendumCAT#1Oct#Sípic.twitter.com/eg3idhhdrf

— Guilhèm Puyol Caubet (@GuilhemPuyol) 17 de setembre de 2017