Las fins dels campionats de Superliga e d’NRL se sarran. Los Dragons Catalans se trapan dissabte amb la partida la mai importanta de jogar d’aquesta sason.
 
Pietat per nòstres nèrvis!
 
Aqueste divendres, los Dragons anavan jogar cò d’Hull KR. Una esquipa assegurada de jogar en Superliga la sason venenta e qu’aviá mandat sus la pelena una formacion rejovenida. Lo capitani dels Catalans Casty, nafrat, a benlèu acabat sa sason. Agèrem dreit a l’ensag de Myler sus passa al pè de Walsh, mai la transformacion e una penalitat del mièg de dobertura. Los catalans menavan 8-0 a la pausa e avián mancat mai d’una escasença de faire lo trauc.
 
La represa se revelèt catastrofica: manca de ligam, palmas tombadas, decas inutilas… L’arbitratge s’ i metèt: l’arbitre e son adjunt de la tòca se ganhèron un contracte a vida cò d’Afflelou en vesent pas una passa en abans de primièra que menava a un ensag dels angleses. Hull KR n’ajustava dos e un tombat. A mens d’un quart d’ora de la fin, los Sang e Aur èran menats 19-8. Inu mancava una palma d’ensag, mas dins las darrièras dètz minutas, Thornley puèi Williame puntavan l’ensag. Walsh los transformava. Demorava als angleses de mancar (de gaire) una novèla penalitat per daissar partir los catalans amb una victòria tirada pels pelses: 20-19.
 
Dissabte, los Dragons reçaupràn Widnes a Brutus. Una victòria e es lo manten en Superliga la sason venenta. Una egalitat o una desfaita e caldrà passar per un barratge (una partida a la mòrt) lo 30 de setembre del costat de Leigh.
 
Coma qué, valdriá mai ganhar aqueste dissabte!
 
 
Hull FC, St Helens, Wigan: un de tròp per las mièjas finalas
 
Al nivèl superior, se sap ja que Castleford e Leeds jogaràn las mièjas finalas a domicili. Hull FC en ganhant 19-18 contra Wakefield escarta un concurrent per la qualificacion. St Helens que bat Huddersfield 40-16 pren la quatrena plaça a Wigan batut sus sa pelena per Castleford 38-20. St-Helens pòt confirmar sa qualificacion per una victòria a Huddersfield dijòus, alara qu’Hull FC serà en dificultat a Castleford. Lo campion Wigan se pòt encara qualificar, se Hull o St Helens pèrdon, en vencent dissabte a Wakefield.
 
 
Tolosa vòl lo Bloquièr
 
Tolosa a preparat sa mièja finala del Bloquièr del Championship amb una victòria 38-34 fàcia a Swinton. Dissabte, a 3 oras e mièja, per aquesta mièja finala, los occitans reçaupràn sus la pelena de Blanhac la formacion de Dewsbury.
 
 
NRL: Los Vaquièrs son totjorn aquí
 
En Austràlia, en barratge, divendres, los Bròncos de Brisbana demorèron mèstres a l’ostal fàcia a las Pantèras de Penrith: 13-6.
 
Los Vaquièrs se son qualificats mai que just en ueitena posicion. Aprèp aver ganhat cò dels campions Cronulla aprèp prolongacion, son anats batre las Anguialas de Parammatta 24-16. Las mièjas finalas opausaràn Melbourne e Bròncos de Brisbane, divendres, d’un caire, e Polets de Sydney e Vaquièrs, dissabte, d’autre caire (partidas de seguir sus BeInSport).
 
 
 
 
Alan Roch