La Gàrdia Civila espanhòla intrèt ièr de matin dins plusors sètis del govèrn de la Generalitat de Catalonha, dont lo de las finanças, lo dels afars socias e lo de las relacions institucionalas. Los agents faguèron mai d’una quarantena de perquisicions, detenguèron catorze nauts foncionaris e metèron en examen un vintenat de personas. Los ciutadans prenguèron per milièrs las carrièras en Catalonha tota per protestar contra aquela accion. De remarcar l’acamp davant lo sèti del departament de las finanças, al centre de Barcelona, un acamp que comencèt a 8h espontanèament quand se saupèt l’operacion de la Gàrdia Civila e que s’es tengut durant tota la nuèch passada.

L’operacion de la Gàrdia Civila, nomenada Anubis en onor del dieu egipcian de la mòrt, aurià la tòca de cercar de documents restacats amb lo referendum d’independéncia de Catalonha e Aran previst pel 1r d’octòbre que ven, que lo govèrn espanhòl a declarat illegal. Un jutge auriá ordenat aquela operacion en acusant los detenguts de desobesissença, prevaricacion e malversacion de fonzes publics.
 
En mai d’aquò, la Gàrdia Civila faguèt de perquisicions dins divèrsas entrepresas privadas de Catalonha en arrestant qualques dirigents, dins las societats e dins lors abitacions. Los detenguts son restacats amb los sits web e los bulletins de vòte del referendum. La Gàrdia Civila auriá confiscat dètz milions de bulletins de vòte.
 
Las finanças de la Generalitat de Catalonha son ara a las mans del govèrn espanhòl.
 
 
Revolucion democratica
 
A partir de 8h, quand se comencèt d’aprene l’intrada de la Gàrdia Civila dins mai d’un sèti de la Generalitat, d’acamps espontanèus sorgiguèron en Catalonha tota, quitament Perpinhan. De centenats de milièrs de personas prenguèron las carrièras de las principalas vilas catalanas, ont de volontaris lor portavan d’aiga e quicòm per manjar.
 
Fòrça escòlas decidiguèron de clavar per que se poguèsse manifestar, e quitament plusors entrepresas daissèron partir los salariats en priorizant la defensa de la democracia.
 
Al crit de “Votarem!”, l’acamp de Barcelona s’es tengut durant tota la jornada e fins a una ora avançada la nuèch davant lo sèti del departament de las finanças. La principala artèria de circulacion de la ciutat, la Gran Via de las Corts Catalanas, foguèt barrada a la circulacion durant tota la jornada de dimècres passat.
 

 
 
Sètge de la CUP
 
Non luènh d’aquí, de centenats de milièrs de personas  se reüniguèron tanben davant lo sèti de la CUP, qu’èra encerclat per d’agents de la dicha Polícia Nacionala espanhòla, e mai d’un agent en civil encagolat. Durant uèch oras los agents esperavan un òrdre del jutge per escorcolhar los locals, mas l’òrdre arribèt pas e partiguèron. La CUP se regaudís de la resisténcia pacifica.
 

Continua la concentració massiva i pacífica davant de la seu de la CUP de Barcelona #sensepor#HolaRepública#1OCTpic.twitter.com/CAnuvO9kAy

— CUP #referèndumCAT (@cupnacional) 20 de setembre de 2017

 
Puigdemont: “L’estat a aplicat de facto l’estat d’excepcion”
 
Pauc après miègjorn, lo president de la Generalitat de Catalonha, Carles Puigdemont, parlèt als mèdias acompanhat de tot son govèrn.
 
“L’estat espanhòl a mes en suspension de facto l’autogovèrn de Catalonha e a aplicat de facto l’estat d’exepcion. [...] Aquela agression es fòra de tot aparament legal. S’es atacat l’estat de drech e totas las garentidas constitucionalas en tot violar la carta dels dreches fondamentals de l’Union Europèa. [...] Lo govèrn espanhòl a despassat la linha roja que los separava dels regims autoritaris e repressius e es vengut una vergonha democratica”.
 
En mai d’aquò, lo president declarèt son engatjament pel referendum e afirmèt que lo primèr d’octòbre totòm poiriá votar. “Nos caldrà una actitud de serenitat davant las actituds menaçantas e las illegalitats que comet lo govèrn espanhòl”, çò diguèt.
 

L'Estat espanyol ha suspès de facto l'autogovern de Catalunya i ha aplicat de facto un estat d'excepció https://t.co/GL8tF6DS7d#1Octpic.twitter.com/s6IlQS5ZE4

— Carles Puigdemont (@KRLS) 20 de setembre de 2017

 
 
Rajoy: “An temps d’evitar un sòrt pièger”
 
De ser, après 21h, parlèt als mèdias lo president del govèrn espanhòl, Mariano Rajoy. Aqueste afirmèt que “lo referendum se [fariá] pas” en disent qu’èra “una quimèra impossibla” e menacèt tornarmai lo govèrn de la Generalitat: “An temps d’evitar un sòrt pièger”.
 
Rajoy justifiquèt lo còp d’estat contra lo govèrn catalan en assolidant que “degun pòt èsser subre la lei” e apondèt que “la desobesissença a la lei de part d’un poder public es quicòm de contrari a la democracia”.
 
 

Los principales titulares de la comparecencia de Rajoy en relación a la actualidad en Cataluña sobre el 1-O  https://t.co/gFuzt8w9LRpic.twitter.com/w0nLnAxkne

— Antena3Noticias (@A3Noticias) 20 de setembre de 2017

 
 

Reaccions de qualques elegits occitans












     
        
    

fffff		fffff
	Peth drèt de vòt (poemòt monosillabic aranés) Jo non voi mès eth sòn mau vent, eth sòn cèu gris n’eth sòn peish gròs, ne pan deth sòn n’eth sòn gran rei n’era sua lei, qu’è set de vin, non pas de sang. Voi eth mèn dret de vòt tà jo, que deth sòn frau jo ja n’è pro! Xavi Gutiérrez Riu (20.09.2017)