Aperaquí cent personas serián mòrtas aquesta setmana davant la còsta libiana après que lo vaissèl que i viatjavan foguèt demorat sens combustible, segon la gàrdia litorala del país nòrd-african, qu’a confirmat la descobèrta de quatre cadavres e la possibla desaparicion de mai d’un centenat de personas.
 
Los quatre cadavres trobats pels gardacòstas èran acompanhats de sèt subrevivents. Lo vaissèl derivava dempuèi qualques jorns, après èsser partit de la vila de Zuwara. “D’autres 21 migrants nadèron fins a la plaja e foguèron localizats” mas “se crei que mai de cent son desapareguts”, çò explicava Ayoub Qassem, pòrtavotz de la gàrdia litorala de Libia. Un dels subrevivents moriguèt puèi a l’espital ont lo menèron. A l’ora d’ara lo bilanç oficial parla de 5 victimas.
 
Libia es lo principal ponch de partença dels migrants e refugiats qu’ensajan d’arribar en Euròpa en traversant Mediterranèa. Las organizacions pròdreches umans alèrtan que de milièrs de personas son atrapadas en territòri libian.