Lo president francés, Emmanuel Macron, prononcièt dimars passat son primièr discors a l’Assemblada Generala de l’ÒNU, e o faguèt en tot mostrar sa fermetat a manténer l’Acòrdi de París per arrestar lo cambiament climatic. Lo messatge de Macron s’adreiçava mai que mai al president estatsunidenc, Donald Trump, qu’aviá anonciat de quitar l’acòrdi. “Recularem pas. Respectam prigondament la decision dels Estats Units. La pòrta serà totjorn dobèrta mas los autres estats contunharem de seguir l’acòrdi de París”, çò assolidèt.
 
Macron aguèt d’autras discordàncias amb Trump, especialament sus Iran. Segon lo president francés, es una “error grèva” de denonciar sens ofrir d’alternativa l’acòrdi nuclear de las poténcias internacionalas amb lo govèrn iranian. Trump aviá parlat qualques oras abans a l’Assemblada Generala, tanben dins son primièr discors, per criticar l’acòrdi que permetiá de restrénher lo programa nuclear iranian, que lo qualifiquèt de “vergonha”. Segon Macron, l'acòrdi es “solide” e “essencial per la patz”. E soslinhèt que de lo respectar pas seriá “irresponsable”.
 
Lo president francés mençonèt tanben la crisi del pòble rohingya en tot denonciar lo “netejatge etnic” que patisson.