Qualques desenats de personas manifestèron divendres passat a Pau lor solidaritat amb lo pòble catalan. L’acamp se tenguèt davant lo consolat espanhòl e seguissiá la crida de l’esquèrra revolucionària occitana de la Tor deu Borrèu. Los manifestants mostrèron lor supòrt “al pòble de Catalonha après lo còp d’estat contra las institucions catalanas e los refuses envèrs la populacion de se poder exprimir sul desir d’independéncia a travèrs d’un referendum”.
 
Participèron a la manifestacion de representants del Partit Occitan, dels verds franceses, de La França Insomesa, del movement Ensemble, de simpatizants de la Republica Espanhòla, del movement de sosten a Palestina, e una bona representacion d’artistas e musicians occitans.
 
Los manifestants critiquèron “los metòdes emplegats pel govèrn de Madrid dignes de son passat franquista” e “las politicas d’intervenir pas en l’afar espanhòl de part d’Euròpa e França”. D’autre caire, felicitèron lo pòble catalan per “la lor determinacion unida e pacifica d’acarà’s a Madrid e a un desplegament policièr jamei vist despuish ua bèra pausa”. Dins aquel sens, afirmèron quitament que Catalonha es “un pòble hrair que’ns mòstra lo camin de la dignitat e la libertat”.
 
Après las presas de paraula, l’acte finiguèt coma aviá començat, amb una vibranta cantada revolucionària ont sonèt, demest d’autres, L’Estaca dins sa version en occitan de Bearn.
 
 
A Tolosa
 
Dimècres passat, mentre que l’estat espanhòl deteniá de nauts foncionaris de la Generalitat de Catalonha e li ne preniá qualques sètis, e que lo mond manifestava per centenats de milièrs a Barcelona, se creèt a Tolosa un collectiu nomenat Occitània per la Democracia en Catalonha e manifestèron davant lo consolat espanhòl de la Ciutat Mondina.
 
“Sèm aicí per la democracia”, çò declarava un pòrtavotz del collectiu a La Dépêche en precisant que “las institucions de Catalonha son estadas atacadas per la polícia espanhòla”.
 
 
Peticion a Juncker
 
De son costat, Iniciativa per Occitània a lançat una campanha de signaturas en linha “per la libertat e l’estat de drech en Catalonha”. La peticion es adreiçada al president de la Comission Europèa, Jean-Claude Juncker, e li demanda que demòre pas silenciós.
 
Los signataris dison a Juncker que “se lo mot «Euròpa» a encara un sens, podètz pas restar mut e inactiu fàcia a aquesta negacion dels principis mai fondamentals de l’estat de drech e de la libertat civila”
 
“S’agís pas pus d’un «afar intèrn» a l’estat espanhòl, ne va desenant de l’onor d’Euròpa e de sa mission”, çò conclutz la peticion.
 

 
Per quant a ela, l’Assemblada Nacionala Occitana (ANÒC) a publicat un comunicat que condemna las operacions actualas de l’estat espanhòl, defend lo drech dels catalans de votar se vòlon un estat independent, e revendican que l’estat que ne sortisca siá binacional e se nomene “Catalonha e Aran”.
 
D’autres movements occitanistas coma País Nòstre se son mobilizats per sosténer lo referendum en Catalonha e Aran. 


Comunicat de l'Institut d'Estudis Araneses

De son costat, l'Institut d'Estudis Araneses-Acadèmia Aranesa de la Lenga Occitana, a publicat un comunicat que sosten lo "Dret de decidir deth pòble catalan e aranés, e refuse es eveniments que viu actuaument Catalonha, a on fòrça catalans e es institucions catalanes an estat caushigadi enes sòns drets e libertats"


 
Sardenha, Astúrias e endacòm mai
 
De fach, las mòstras internacionalas de sosten a Catalonha an luòc per tot lo Mond, entre las qualas poiriam soslinhar las accions del Conselh Regional de Sardenha e e dels movements d’esquèrra d’Astúrias.
 
Lo Conselh Regional de Sardenha aprovèt fa qualques jorns una mocion qu’exprimís la solidaritat amb lo pòble de Catalonha. En mai d’aquò, de deputats sardes an demandat al govèrn de l’illa qu’estampe e sèrve de bulletins de vòte e de material electoral per assegurar lo referendum de Catalonha e Aran.
 
Enfin, en Astúrias, qualques movements de l’esquèrra sobeiranista acampats dins lo sit apelat Llar La Llegra, an mostrat lor solidaritat amb lo pòble catalan. En mai d’aquò, l’espaci Llar La Llegra es a estampar de bulletins de vòte que se distribuiràn en Catalonha e Aran lo jorn del vòte.