Aguèt luòc ièr dimenge en Catalonha e Aran tota una afichada massissa en defensa del referendum d’independéncia del 1r d’octòbre que ven. Amb lo nom de “Maraton per la democracia, l’eveniment es un dels actes de la campanha electorala organizats per l’Assemblada Nacionala Catalana (ANC) e Òmnium, e vòl contestar la repression de las autoritats espanhòlas qu’an blocat lo govèrn de la Generalitat, qu’an enebit lo vòte, la publicitat del referendum, e qu’an raubat de centenats de milièrs d’afichas e dètz milions de bulletins de vòte.
 
La convocacion èra davant las comunas e se i faguèt d’obradors de creacion d’afichas, de murals e de bandeiròlas. Puèi i aguèt una afichada generala per carrièras.
 
 
Un milion de bulletins de vòte
 
A Barcelona, l’eveniment comportava una suspresa: lo president d'Òmnium, Jordi Cuixart, anoncièt qu'avián estampats fòrça bulletins de vòte, e los faguèt virar per los distribuir per tot lo territòri. Dins la sola Universitat de Barcelona, ont los estudiants i son acampats fins al 1r d’octòbre, se distribuiguèt 100 000 bulletins. A Barcelona se’n compartiguèt un milion.
 
 
En Aran
 
Mentretant, la plaça de la glèisa de Vielha èra comola de mond que s’acampavan en seguissent l’apèl dels signataris del Manifèst de Les. Al crit de “Votaram”, mai d'un centenat de protestataris manifestèron per la democracia e la libertat d’expression, e mostrèron lor refús de las politicas de repression del govèrn espanhòl.