La CDU a ganhat las eleccions federalas d’Alemanha amb lo 33,5% dels vòtes, segon lo primièr sondatge a la sortida de las urnas fach per l’ZDF, la radiotelevision publica del país. Per tant Angela Merkel servarà sa carga e serà la cancelièra per son quatren mandat consecutiu. Los socialdemocratas de l’èx-president del Parlament Europèu Martin Schulz, seràn tornarmai la segonda fòrça del Bundestag amb lo 21% dels vòtes. S'agís del pièger resultat dels socialdemocratas de las darrièras vint annadas.
 
Se se confirma lo pronostic, lo partit xenofòb d’ultradrecha Alternativa per Alemanha (AfD) intrarà al parlament coma tresena fòrça amb lo 13% dels vòtes. Lo Partit Democratic Liure (FDP) obtendriá lo 10% dels vòtes e seriá la quatrena fòrça, del temps que los Verds (Grüne) seràn los cinquens amb lo partit esquerrista Linke (9%).
 
Aperaquí 61,5 milions d’alemands èran cridats a las urnas per elegir la nòva composicion del Bundestag, la cambra bassa del parlament. La CDU èra ja en tèsta de totes los sondatges davant los socialdemocratas pendent tota la campanha electorala.
 
Après l’eleccion als Païses Basses e la presidenciala e las legislativas de França, las eleccions federalas d’Alemanha barran un cicle electoral de l'Union Europèa dins lo qual se crenhiá que qualque partit euroesceptic obtenguèsse la victòria.
 
Per ara, l’ultradrecha a pas capitat a ganhar cap d’eleccion, malgrat sa creissença.