L’Union Europèa es estada premiada amb lo prèmi Nobel de la patz 2012 per los “mai de sièis decennis de contribucion a l’avançada de la patz e la reconciliacion, la democracia e los dreches umans en Euròpa”, segon çò qu’a raportat lo comitat Nobel del parlament norvegian.

“L’atròç sofriment de la Segonda Guèrra Mondiala demostrèt al Mond lo besonh d’una nòva Euròpa. Pendent un periòde de setanta ans, Alemanha e França se combatèron en tres guèrras. Uèi, una guèrra entre Alemanha e França es impensabla. Aquò demòstra cossí, mejançant d’esfòrces amb de bonas intencions e en bastissent una relacion de fisança mutuala, los enemics istorics son venguts d’estreches aliats”, çò diguèt lo comitat en un comunicat.
 
Tanben remembra l’incorporacion de Grècia, Espanha e Portugal a l’Union Europèa e lo fach que la democracia foguèt un requisit per que se poguèsson apondre al club comunitari. “La casuda del mur de Berlin faguèt possible que s’incorporèsson a l’Union Europèa divèrses païses del centre e de l’èst d’Euròpa, en dobrissent una nòva epòca dins l’istòria europèa. La division entre l’èst e l’oèst arribèt a la siá fin; la democracia s’es refortida, fòrça conflictes etnics se son resolguts”.
 
L’institucion soslinha l’incorporacion venenta de Croàcia al club dels vint e sèt, lo començament de las negociacions amb Montenegro e la concession de l’estatut de candidat per Serbia coma de decisions que “refortisson lo procès de reconciliacion dins los Balcans”. “Lo darrièr decenni, la possibilitat que Turquia s’incorporèsse a l’UE a supausat d’avançadas en democracia e en dreches umans dins aquel país”, çò apond.
 
“L’UE s’afronta a l’ora d’ara a de grèvas dificultats economicas e a un malcontentament social important. Lo Comitat Nobel norvegian se vòl centrar en çò que vei coma lo succès mai grand de l’UE: lo succès de la lucha per la patz e la reconciliacion e per la democracia e los dreches umans”, e soslinha lo ròtle “estabilizaire” qu’a agut l’UE per transformar una Euròpa qu’èra “un continent de guèrra” en “un continent de patz”.
 
Segon la lor opinion, lo trabalh dels representants comunautaris rebat la “l’afrairament entre nacions” e sembla los “congrèsses de la patz” que ne parlava Alfred Nobel a prepaus dels critèris per autrejar lo prèmi per la patz.