Las Calandretas d’Occitània tota manifestèron lo 26 de setembre passat contra la supression dels contractes ajudats, una nòva politica de Macron qu’a menat las escòlas occitanofònas a una situacion desesperanta. Se tenguèron d’acamps davant las prefecturas de las vilas màgers del país justament aquel jorn, qu’èra la Jornada Europèa de las Lengas.
 
Precisament a l’ocasion de la Jornada Europèa de las Lengas, “devèm remembrar a l’estat que de promòure la diversitat lingüistica, lo plurilingüisme, l’aprendissatge de las lengas tot long de la vida, pòt pas metre en perilh nòstras escòlas, e doncas, l’ensenhament de l’occitan dont Calandreta es un dels actors màgers”, çò dison lor organizaires.
 
La rintrada es arribada al mièg del desespèr per las Calandetas après que l’administracion francesa a decidit la supression dels contractes d’acompanhament dins l’emplec CAE-CUI, d’ajudas a l’emplec que fins ara an permés de far foncionar la majoritat de las Calandretas.
 
Calandreta representa ara 62 escòlas, 4 collègis e una classa de segonda dins tot lo país. Demest totas las protèstas que se tenguèron en Occitània tota, la còla d’Orlhac an mandat lor rapòrt e fòtos a la redaccion de Jornalet.
 
 
Orlhac
 
A Orlhac (Castanhau) una delegacion de parents, enfants e amics de la Calandreta del Vernhat foguèt recebuda per la cap del cabinet de la prefècta après l’acamp. Aquí, los manifestants expliquèron lors chepics a l’administracion: la supression dels contractes ajudats daissarà de desenats de personas sens emplecs, e plusors enfants perdràn l’escasença d’aver l’educacion en occitan. Dins lo cas concret de la Calandreta del Vernhat i a un emplec suprimit e un autre menaçat.