L’associacion dels Companhs de Paratge s’interèssa a las relacions de l’istòria amb l’actualitat dins lo mond occitan e mediterranèu. En aqueste mes d’octòbre, prepausa tres rendètz-vos en tèrra d’Aude.

Del gran al pan…
 
D’en primièr, lo divendres 13, a 6 e mièja del vèspre, a la librariá Mots & Cie de Carcassona, se tendrà un rescontre amb lo molinièr fornièr de Cucunhan, Rotland Feuillas, a l’escasença de la sortida de son libre d’entreten amb Joan-Felip Tonanc: À la recherche du pain vivant (Actes-Sud).
 
 
Una jornada suls vents e suls molins
 
Lo dissabte 14, es una jornada de rescontres qu’es organizada en Cabardés a Mossolens a l’entorn dels vents e dels molins.
 
De matin, se parlarà dels molins en Cabardés (amb Gérard Dellús e Joan-Claudi Caperà) e en Lauragués (amb Pèire Mercié). Aprèp lo dinnar, Mirelha Braç e Alan Roch contaràn los imatges del molinièr dins las cançons, los contes e los provèrbis d’Occitània (“Lo molinièr que passa de farina… Lo molin de Cantarana quand a de grana…”). Josiana Ubaud clavarà la tièra de las intervencions amb una evocacion del lexic dels vents en Occitània e promet “un revolum de mots e de dires”.
 
Aprèp aqueste temps de discussion, lo contaire Joan-Jaume Delpotz vendrà dire qualques contes (a 5 e mièja del vèspre) al ritme de las alas del molin, de l’ase del molinièr e de la virada del Cèrç.
 
 
La Crosada en Lauragués
 
Dijòus 19 d’octòbre, a Vilaspin (Sala de las Fèstas, 6 e mièja del vèspre), Joan-Loís Gasc evocarà las batalhas del temps de la Crosada contra los Albigeses que se debanèron en Lauragués. Aquesta intervencion serà illustrada per la lectura dels tròces de la Cançon de la Crosada sus aquestes eveniments: una lectura en tres versions: occitan medieval (Miquèla Stenta), occitan modèrne e francés (Mirelha Braç e Alan Roch)
 
 
 
 
Alan Roch
 
 

---

Per ne saber mai: compagnonsparatge.blogspot.com