Las mobilizacions per lo referendum d’independéncia de Catalonha e Aran que se tendrà deman, son nombrosas e estonantas. D’un caire, l’estat manda de jutges e de policièrs contra los elegits e los foncionaris, barra de sits web, confisca de bulletins de vòte e d’afichas... De l’autre, los estudiants efectuan la cauma pus nombrosa de l’istòria de Catalonha, los pompièrs manifèstan en favor del referendum, los païsans marchan amb lors tractors e la comunautat educativa fa una multitudinària e simbolica remesa de claus dels centres escolars al president Carles Puigdemont. D’aquel temps, se multiplican per desenats de milièrs los volontaris per trabalhar durant la jornada electorala, los volontaris per protegir los burèus de vòte e quitament los avocats volontaris per ajudar los eventuals reprimits per las fòrças de l’òrdre desplaçadas en Catalonha e Aran.
 
De totas aquelas manifestacions, nos a estonats lo concèrt de 3000 cantaires e  musicians en sosten al referendum e contra la repression de la polícia espanhòla e de la Gàrdia Civila. Lo concèrt, organizat pel collectiu de Musicians per la Libertat, prepausèt las sardanas “Sant Martí del Canigó” e “La Santa Espina”, lo “Cant de la Senyera”, l’imne catalan “Els Segadors” e la populara cançon de Lluís Llach “L’Estaca”.