Los partits basquistas se presentan a las eleccions de la comunautat autonòma del Bascoat (“Euskadi”) amb de programas d’internacionalizacion de la realitat nacionala basca. Lo Partit Nacionalista Basco (PNB) soslinha l’entrepresariat e l’escomesa per la marca “Basque Country”, del temps qu’EH Bildu prepausa la creacion d’una euroregion nomenada Bascoat (“Euskal Herria”), que permeta de superar la frontièra entre los Estats espanhòl e francés.

Una de las criticas mai frequentas, segon los partits nacionalistas espanhòls presents al Bascoat amb una representacion institucionala (PP e PSÒE mai que mai), es que las formacions ligadas al nacionalisme basco se significan per lor barrament e per lor obsession de metre de frontièras que separan. Totun, segon los faches es pas aital. Fàcia a las eleccions autonomicas venentas del 21 d’octòbre, los partits espanholistas parlan pas d’estimular las relacions internacionalas, o prescindisson perque considèran qu’aquela foncion aperten a Madrid.
 
Per contra, dins lo programa electoral del PNB e d’Euskal Herria Bildu, la projeccion internacionala del Bascoat es un tèma basic. Aquela projeccion es mai que mai fondamentala ara: d’un caire, dins l’encastre de la mondializacion; e d’un autre caire, en acòrd amb la consciéncia sociala que lo Bascoat restariá una nacion marginalizada sens las relacions internacionalas destinadas als escambis amb d’autres pòbles e sens la reconeissença necessària per intrar dins l’airal dels pòbles liures.
 

PNB: internacionalizar las entrepresas e impulsar la marca “Basque Country”
 
Segon lo programa electoral del PNB, la potenciacion de la politica internacionala deu aver un caire, primièrament, economic. Lo candidat del PNB a la lehendakaritza (presidéncia), Iñigo Urkullu, o comentava e precisava dins un discors sus l’aplicacion del programa electoral del PNB: “cal acompanhar las entrepresas en la recèrca de mercats novèls, en activant un Plan d’Accion Exterior que permeta d’agrandir l’encastre d’accion basco vèrs Asia-Pacific, l’America del Sud, los Estats Units, lo nòrd d’Africa e los membres nòus de l’Union Europèa”, çò disiá.
 
Per o aténher, disiá que caldriá potenciar de delegacions del Bascoat autonòm (“Euskadi”) dins los ponches estrategics del Mond, en ensajant qu’en cada luòc siá mesa en relèu la marca “Basque Country”. Per dobrir de camins nòus, serà imprescindible d’enregar un Plan de Connectivitat Exteriora. D’aquela faiçon, lo PNB poirà sometre l’internacionalizacion tanben coma via d’escapament a respècte del mercat espanhòl.
 

EH Bildu: crear una euroregion del Bascoat (“Euskal Herria”) per superar la frontièra francoespanhòla
 
Per çò qu’es d’EH Bildu, son programa electoral explicita qu’un dels pilars de l’accion d’aquel partit deu èsser las relacions internacionalas, e mercés a aquelas, se poirà promòure la volontat del pòble basco de s’emancipar. Las relacions inernacionalas, çò dison los abertzales (patriòtas), sostendràn las accions encaminadas vèrs la reconeissença de la sobeiranetat del Bascoat de la part d’autras nacions.
 
Per articular e promòure melhor las relacions internacionalas, EH Bildu s’engatja a crear un Departament de las Relacions Exterioras. Justament, la persona ja designada per lo dirigir dins la coalicion independentista es Jon Etxabe, qu’a anonciat qu’unas de las primièras activitats del servici serà la celebracion de doas conferéncias internacionalas, una sul drech a l’autodeterminacion e l’autra sus la creacion de l’euroregion del Bascoat (“Euskal Herria”), pensada en tèrmes comprensibles pels ciutadans europèus, mas amb la clara intencion d’amassar, a partir de l’aplicacion dels principis de la sobeiranetat partejada, lo pòble basco entièr, en tot superar la frontièra estatala francoespanhòla. Al delà, lo departament mençonat s’ocuparà tanben de fomentar los contactes amb la diaspòra e d’estendre dins tot lo Mond la marca “Euskal Herria”, que cèrca de metre un sagèl pròpri a la difusion dels produches e bens que confeccionan los bascos.
 





Aqueste article ven del jornal catalan Nationalia.cat, amb qui Jornalet a un acòrdi de cooperacion.