Almens 58 mòrts e cent ferits es lo bilanç provisòri d’una fusilhada que se tenguèt dimenge durant un concèrt de plen aire a Las Vegas (Estats Units). Catòrze ferits se tròban en estat critic, segon de fonts medicalas. La polícia abatèt un òme considerat coma l’autor presumit del masèl, qu'an identificat coma un abitant de la vila.
 
Segon divèrses testimònis, i aguèt mai d’un centenat de còps de fuòc que venguèron del dotzen estatge de l’ostalariá Mandalay Bay. La polícia cèrca una segonda persona qu'auriá acompanhat lo suspècte.
 
La fusilhada se debanèt pendent lo concèrt de Jason Aldean, un dels darrièrs cantadors d’aquel festenal de musica country de tres jorns dins la vila de l’estat de Nevada. Quand s’ausiguèt los primièrs còps de fuòc, de centenats de personas fugiguèron.
 
Qualques informacions parlan d’autres incidents simultanèus dins la meteissa vila. Mas la polícia crei que lo suspècte abatut agiguèt tot sol.