Uèi Tolosa acuèlh una granda manifestacion per reclamar una lei que permeta lo desvolopament e l’ensenhament de la lenga occitana. La protèsta se passarà dins l’encastre d’una jornada revendicativa dins tota la republica amb de manifestacions parallèlas a Baiona, Perpinhan, Kemper, Aiacciu e Estrasborg. Dins lo cas de la manifestacion per l'occitan s’espèra d’amassar qualques desenats de milièrs de personas, après que la darrièra convocacion, realizada en 2009 a Carcassona, amassèt 25 000 occitans en defensa de la lor identitat. Precedentament, l’an 2007, 20 000 personas s’amassèron a Besièrs e en 2005 foguèron 10 000 los manifestaires a Carcassona. Aquelas donadas indican una incontestabla mobilizacion creissenta dins tot lo país.

La tòca de la manifestacion d’uèi es de reclamar a las autoritats politicas francesas l’aprovacion d’una lei que balhe un estatut juridic a las lengas dichas regionalas e que permeta, dins lo cas de l’occitan, l’aplicacion d’una politica lingüistica coerenta e eficaça. Aquela lei deuriá aver de consequéncias positivas dins lo terren de l’ensenhament, dins la vida publica, dins los mèdias e dins l’encastre de la creacion artistica e literària.
 
La marcha es convocada e organizada per Anem Òc!, un collectiu qu'amassa l’Institut d’Estudis Occitans (IEO), las Calandretas e l’associacion Òc-Bi, en collaboracion amb Convergéncia Occitana, e lo Centre Regional d’Ensenhament en Occitan (CREO). Al delà, i an aderit un desenat d’autras entitats e un molon de personas al nivèl individual, qu’an balhat de vam a la convocacion e an fach que los organizaires sián optimistas a respècte del nombre de personas presentas.


Pendent tot lo matin, tre 10h30, la plaça d’Euròpa aculhirà una seguida d’activitats, presentacions e estands de las associacions del país. La cultura, la lenga, la politica, la gastronomia e totas las autras expressions occitanas seràn presentas dins un “Vilatge Occitan” que servirà a demostrar la vitalitat del pòble occitan e a prene de vam per una jornada de revendicacion e de fèsta.



La manifestacion, qu’aurà per devisa “Anem Òc! per la lenga occitana”, farà un bèl percors pel centre de la vila. Sortirà a 14h00 de la plaça d’Euròpa e acabarà sus la plaça del Capitòli. Per anar d’un luòc a l’autre, la marcha seguirà los baloards de Lascrosses, d’Arcole, d’Estrasborg e de Carnot, virarà a drecha per la carrièra de Mètz fins a la carrièra d’Alsàcia-Lorena, ont virarà un autre còp a drecha fins a la carrièra de La Faieta. Ailà serà lo moment per emplenar amb de drapèls occitans la plaça del Capitòli.
 
Après los discorses finals de la manifestacion, tre 18h00 se debanarà una serada amb de concèrts de Nadau, Lo Còr de la Plana e d'autres grops convidats. Vaquí un biais dels bons per clavar una jornada que deu èsser istorica.


Percors de la manifestacion:


Mòstra una mapa mai granda