L’austrian Felix Baumgartner a capitat l’escomesa que s’èra prepausada: a batut lo recòrd de saut en nautor, en se daissant caire dempuèi mai de 39 000 mètres, e a passat la paret del son sens cap de supòrt mecanic, una fita que jamai degun l’aviá pas capitada.

Dimars passat li calguèt anullar definitivament l’ensag, après qualques ajornaments temporals pendent la serada, mas uèi las condicions meteorologicas e la manca de vent fòrt an permés que Baumgartner capite l’escomesa.
 
Per sautar, s’es envolat amb un balon fins a l’estratosfèra terrèstra, suspendut dins una capsula pressurizada de 1315 quilogramas, e s’es lançat en casuda liura dempuèi 39 000 mètres: a agantat una velocitat de casuda de mai de 1000 quilomètres ora e a passat la paret del son.
 
Lo sautaire, de quaranta tres ans, foguèt ja en 2003 lo primièr a traversar la Manja, esquipat amb una ala de fibra de carbòni, tanben en un saut en casuda liura.
 
Baumgartner s’èra preparat pendent fòrça ans amb l’idèa de superar las marcas establidas per l’ancian coronèl estatsunidenc Joe Kittinger, fa mièg sègle.
 
L’espròva a servit tanben per fornir de donadas scientificas, amb la tòca de melhorar la seguretat dels viatges espacials e de desvolopar de procediments de fugida d’una nau espaciala a granda nautor.