Lo president de la Generalitat de Catalonha, Carles Puigdemont, faguèt dimècres de ser son enena crida a la negociacion politica e a la mediacion amb lo govèrn espanhòl, dins una compareissença institucionala ont critiquèt lo discors qu’aviá fach la velha lo rei d’Espanha, Felip VI. “Pas atal! —çò diguèt lo president—. Avètz decebut fòrça mond en Catalonha que vos presavan esperavan de vos un autre ton e un engatjament pel dialòg”.
 
Puigdemont critiquèt que Felip VI aguèsse pas agut “cap de ròtle moderaire, ni cap d’interès per acceptar un ròtle de mediator, mas [sostenguèsse] las decisions del govèrn espanhòl per liquidar las aspiracions del pòble catalan”.
 
Dins aquel sens insistiguèt per proposar que i aguèsse mediacion per resòlver lo conflicte, e se declarèt tornarmai dobèrt al dialòg e a la negociacion. “Mantendrem totjorn l’escomesa del dialòg e mon govèrn se desviarà pas de son engatjament de patz e de serenetat, mas tanben de fermetat amb la quala volèm far las causas”.
 
Una partida del discors la faguèt en castelhan, en s’adreiçant als ciutadans espanhòls qu’an mostrat lor solidaritat amb los catalans. “Grandmercegi l’esfòrç de fòrça gents per acompanhar lo pòble catalan dins sas revendicacions. Sèm un sol pòble qu’a pas cap de problèma amb las nacionalitats ni las ideologias”.
 
Enfin, Puigdemont afirmèt net e clar que los catalans se trobèsson “mai près d’aténher [lor] desir istoric”, en tot anonciar que “dins los jorns avenidors [mostrarián] tornarmai la melhora cara de [lor] país quand [aurian] d’aplicar lo resultat del referendum”.
 



Lo messatge agressiu del rei
 
Dimars de ser, totun, après una jornada de cauma generala multitudinària en Catalonha, lo rei d’Espanha faguèt un discors televisat fòrça agressiu en escartant tota possibilitat d’arribar a un acòrdi. Felip VI acusèt lo govèrn de la Generalitat de Catalonha d’èsser desleial, d’agir fòra de la lei e d’èsser “al marge del drech e de la democracia”. E mai s’anoncièt pas cap de mesura concreta, aquel discors crispat sembla de precedir de mesuras fòrça duras contra Catalonha.
 
Lo rei diguèt pas un mot a prepaus dels incidents de dimenge, ni dels centenats de nafrats provocats per la polícia espanhòla.
 


 
Debat al Parlament Europèu
 
Mentretant, totjorn dimècres passat, lo Parlament Europèu aviá fach un debat pel primièr còp sus la situacion politica en Catalonha. Totes los grops politics apelèron al dialòg per resòlvre lo conflicte entre la Generalitat e lo govèrn espanhòl e dobrir una negociacion. Lo grop dels Verds e los eurosceptics denoncièron durament la violéncia de l’estat espanhòl, del temps que los conservators, los socialdemocratas e los liberals soslinhavan que Catalonha deuriá respectar las leis espanhòlas. Dins lo meteis èime, los grops majoritaris rebutèron una declaracion d’independéncia del Parlament de Catalonha.