Dissabte, als Antipòdes, Novèla-Zelanda resistèt tant que poguèt mas pleguèt en fin de partida fàcia a Australia: 18-10.
 
Dissbate, de l’autra man de Ròse, sus la pelena sintetica de l’estadi Sant-Ruf, los campions carcassoneses afrontavan l’esquipa locala. Los jaune e negre dobrissián la marca pel mesclanha Luke Towers (transformacion de Guiraud), mas Avinhon replicava per dos contres: un ensag de 90 mètres de l’arrièr Gaillard e un autre per Aaron Wood sus un còp de pè contrat. Mas dins las darrièras minutas del primièr temps, Mark Offerdahl en primièr, puèi lo pilar Osea Sadrau qu’interceptava e se jogava de la defensa locala sus 60 mètres permetián als lengadocians de menar a la pausa: 18-12. A la represa, al tèrme d’una cordelada de tenguts, Meads e la transformacion de Gigòt tornavan metre las doas còlhas a egalitat. Mas un tombat mancat de Towers se transformava en passa al pè per l’alièr Roman Peault que puntava al nas d’una desfensa arrestada. Guiraud transformava e ajustava en s guissent una penalitat. La victòria reveniá sus la marca de 26 a 18 a l’ASC qu’a fait mòstra d’una brava soliditat defensiva e d’inspiracion ofensiva.
 
Dimenge, Pià a perseguit son invencibilitat del costat de Lescura d’Albigés: 32-4, alara que Lesinhan coneissiá sa primièra desfaita 36-24 a Sant-Estève en plegant fàcia ade Dragonets mai dinamics.
 
Tolosa caçava sos dobtes, aprèp las desfaitas de las doas setmanas passadas, en dominant 42-16 Vilanòva.
 
Aqueste dissabte 20, plaça al tornèg internacional de la tardor amb lo rescontre França-Galas que se debanarà dissabte, a 4 oras del vèspre, sus l’estadi Bollaert de Lens.
 
Los Blaus retenguts son a nauta intensitat dragonesca amb suls 19 apelats: 13 Dragons, 4 que son passats pels Dragons e 2 jogaires per l’Elita: l’alièr de Pià Sobeiràs e lo pilar de Carcassona: Romaric Bemba. Es la quarantena partida entre las doas formacions e França ne ganhèt 22.
 
S’anatz pas dins lo nòrd, lo país dels corons, poiretz seguir la partida en dirècte sus BeinSport1. Lo pilar de l’ASC XIII Romaric Bemba es de l’expedicion dins lo Grand Nòrd.