Lo 17 de setembre passat, las autoritats de la Generalitat de Catalonha refusavan l’intrada als pòrts del país al vaissèl C-Star, logat pel grop ultradrechista Defend Europe. L’esquipatge demandèt ajuda a las autoritats del pòrt de Palamós car avián pas pus d’aiga, de manjar ni de combustible. En mai d’aquò, expliquèron que i aviá pas pus d’ultradrechistas a bòrd puèi qu’avián desembarcat totes a Malta vint jorns abans e qu’alara solament i viatjavan nòu marins en provenença d’Sri Lanka. En mai d’aquò, avián pintat la còca de la nau en negre en tot escafar los messatges racistas que teniá. Lo vaissèl se tròba ara dins en una situacion plan complicada. Las organizacions umanitàrias e antiracistas de Catalonha protèstan contra sa preséncia davant las còstas catalanas, la nau es ancorada davant lo pòrt de Palamós sens la permission d’acostar e los nòu marins ensajan de pescar, de reculhir d’aiga de pluèja e de subreviure mentre qu’un vaissèl de salvament lor pòrta de temps en temps de manjar e d’aiga. Lo proprietari del batèu es del País de Galas e se n’es desinteressat. Es el que deuriá pagar lo combustible. Mas qual es aquel vaissèl e cossí es arribat a aquela situacion?

En julhet passat, l’organizacion ultradrechista Generacion Identitària anonciava qu’aviá obtengut l’argent per logar un vaissèl e metre en marcha lor mission mai polemica. Segon VilaWeb, los identitaris franceses èran a l’origina d’aquela iniciativa, qu’a ja de ligams amb d’autres grops ultradrechistas d’Euròpa e d’America. Lor tòca èra d’empedir que las organizacions umanitàrias salvesson los immigrants e los refugiats en la Mediterranèa centrala, la rota migratòria amb mai de mòrts e desapareguts. Volián “defendre Euròpa” d’una “invasion estrangièra” e criminalizar las organizacions umanitàrias en tot las acusar de collaborar amb los trafegaires. Lo 27 d’agost passat, l’organizacion anoncièt que lor mission xenofòba èra acabada. Aurián abandonat lo vaissèl amb l’esquipatge dedins.
 
 
Defendre Euròpa
 
En junh passat, l’ultradrecha s’organizava per empedir los salvaments dels immigrants e los refugiats en Mediterranèa. Los divèrses grops europèus de Generacion Identitària metèron en marcha la campanha dicha “Defendre Euròpa” (Defend Europe, en anglés) amb la quala cercavan d’empachar fisicament los salvaments en mar. Fins alavetz se servissián de batèls rapids e de fusadas esclairantas per empedir e boicotar las manòbras dels vaissèls de salvament.
 
Al començament de junh passat, la marina italiana interceptèt un d’aqueles batèls rapids e ne detenguèt los ocupants. Lo batèl l’aviá logat Generacion Identitària. Segon The Guardian, los identitaris islamofòbs avián lançat una campanha de micromecenatge per 50 000 liuras per poder far venir operacional lor plan, e capitèron plan. Explicavan que volián identificar totes los vaissèls de las organizacions umanitàrias que trabalhan en Mediterranèa e los perseguir. Ofrissián pas mai de detalhs mas precisavan que s’inspiravan de las tacticas dirèctas de grops coma Greenpeace.
 
En seguida de l’article de The Guardian, la societat de pagaments en linha PayPal anullèt lo compte de Defend Europe. Totun, lo grop explicava dins un vidèo publicat sus YouTube qu'aviá pogut remborsar los fonzes als donators e qu’avián pas perdut d’argent. Dins aquel vidèo anonciavan qu’un donator lor aviá ofèrt una “nau patriotica” per que poguèsson complir lors “missions”, que se pòdon finançar amb de dons dirèctes sus lor sit web.
 
 
 Ridicul màger
 
Aquela “nau patriotica” dels racistas èra lo C-Star, e se consagrèt a empedir los salvaments de refugiats en Mediterranèa.
 
Per mièg agost, la nau foguèt salvada per l’organizacion umanitària alemanda Sea–Eye davant las còstas de Libia. Ironia del sòrt, la nau dels xenofòbs la socorreguèt una de las organizacions qu’ela o fa tot per boicotar.
 
Coma o explicava l’organizacion umanitària qu’aviá ajudat al batèl racista, èra lo Centre de Contraròtle de Salvament Maritim per la Mediterranèa (CCSM) de Roma que ne demandèt lo salvament. “Se perilhan, los devèm ajudar, es lo dever de totes los que sèm en mar. Devèm pas prene en compte l’origina, la color, la religion o las conviccions”, çò rapòrtava sus Twitter Michael Buschheuer, fondador de Sea–Eye.
 
 
Un ridicul après un autre
 
A la fin de julhet, las autoritats turcochipriòtas detenguèron al pòrt de Famagosta l’esquipatge de la nau C-Star. Dins lo vaissèl trobèron 28 migrants, dont la majoritat venián de Sri Lanka. Los uèch membres d’esquipatge e lo capitani foguèron acusats de trafec de personas e de falsificacion de documents.  Après qu’aguèron fach lor deposicion, las autoritats turcochipriòtas los liberèron per manca de pròvas.
 
Los 28 migrants qu’èran dins lo batèl diguèron qu’avián pagat quitament 10 000 èuros per que los menèsson devèrs Itàlia, e cinc d’eles demandèron l’asil politic dins aquel país e i poguèron anar. Los autres foguèron remandats devèrs Sri Lanka.
 
Tot aquò contrasta amb la tòca de Defend Europe. Aquela organizacion xenofòba nasquèt amb la tòca explicita d’empedir que las organizacions umanitàrias salvèsson de migrants naufragats en Mediterranèa. Los acusan de “trafegar amb de centenats de milièrs d’immigrants illegals en Euròpa e de metre en perilh la seguretat e l’avenir del continent”. Defend Europe, qu’amassèt mai de 75 000 èuros per aquela tòca, considerava que las organizacions umanitàrias que socorron de refugiats en Mediterranèa èran “responsablas de la negada de milièrs d’africans”. Lo grop ultradrechista denonciava que las organizacions umanitàrias amassavan de dons per trafegar amb de personas dins l’encastre d’un ret internacional. Per aquela rason disián que farián “tot çò que poirián” per empachar “las activitats illegalas de las organizacions umanitàrias”. Mas lo grop del C-Star foguèt arrestat, ironicament, per trafec de personas.
 
 
 
 

---

Aqueste article se pòt legir en papièr sul numèro 1086 de La Setmana, amb qui Jornalet ten un acòrdi de cooperacion